National Games 2015 Football Final Zaninah Mizoram leh Punjab

India rama infiamna hunpui National Games khelh mekah zanin dar 7:00 hian Mizoram leh Punjab-in mipa football final an khel dawn.

Kerala-a neih mek National Games-ah hian Mizoram hian Inrinni zana semi final-ah Maharashtra chu 2-1 in an hneh hram a, injury time-a Laldampuia goal thun an chakpui. Final-a an khingpui tur Punjab hian Goa chu 2-0 in an hneh a; Mizoram leh Punjab hi group match-ah insu tawhin Mizoram hi 2-0 in an lo chak tawh.

Final kalkawng hautak

Mizoram hian harsa lo takin group stage an paltlang. West Bengal 2-0 in an hneh a, Punjab 2-0 bawkin an hneh a, khelh hnihah group hmahruaitu an ni chiang nghal dêr. Khelh thumnaah Services chu 2-2 in an draw a, a khelh lina chu semi final niin Maharashtra nen an inkhel.

Maharashtra hi group lehlama pahnihna an ni a, Mizoram tan khelh an hautak hle. An player-te hi ONGC leh Air India player an ni fur a, I League-a tawnhriat lo nei tawhte pawh an ni nawk hlawm a, tharum an ngahin an pumrua a lian zawk bawk a, Mizoramin inkhel dang angin ball an chang tam thei lo.

Second half a inṭan a, Mizoramin goal an thun ta. Brandon VL Remdika chuan a ball ṭha hmuh chu goalkeeper man hmain a va tlawh fuh hman a, minute 49-naah 1-0 a ni - Aizawl FC winger Brandon hi Services an khelh ṭuma penalty vawi hnih hlawh chhuaktu a ni. He mi hnu hian Mizoram hian an khung belh teuh hle a, winger Albert Zohmingmawia chu an khingpuite tan a hnawksak ṭhin hle.

India striker hlui Godfred Periera enkawl Maharashtra-in an si phurh sût an tum a, ball sang an vawrh ṭan a, Mizoram an buai ṭan. Minute 56-na a ni a, Nitesh Monde ball vawrh luh chu Mizoram goalkeeper chuan va nangching mai loin a nghak a, striker Mohammed Irshad chu lo tlan lutin a thun ta mai a, 1-1 a ni.

He mi hnu hian Mizoram buai a zual. Maharashtra lamin vawi duai lo Mizoram goal-a thun tumin ball an vawrh a, ṭum khat chu corner-a ball lo phei Mizoram goal ban an tihper a, Mizoram an him hram.

Hun a tawp dawn tawh a, Kawnpui tlangval H Lalbiakthanga chuan chak tak maiin ball a tlan luhpui a, goal bulah ṭha taka a vawrh luh chu lut thar Laldampuia chuan a tauh lut. Kawrtethawveng tlangval, I-Day Football 2014-a Best Player Dampuia hian West Bengal lamah pawh goal a lo thun tawh bawk.

Hun a tawp zui a, Mizoram an vannei ta zawk a, National Games football inelna­ah final an lut ta. MPL-3 best player Lalram­chullova a ṭangkai a, a partner Khawzawl rawlthar Lalṭhakima pawh a khel chhe lo hle.

Eng nge an sawi?

Mizoram manager Hmingthansanga chuan final an lut lawmawm a tih thu a sawi a, an khelh dan insiam

ṭhat ngai a awm thu leh player ṭhenkhat a tawp lama an buai thu a sawi a, final-ah an insiam ṭhat ngei a beisei.

Mizoram coach K Malsawmkima chuan, "Kan lawm khawp mai. Final luh hi kan inbeisei a, kan beisei anga awlsam chu a lo ni hauh lo. Kan inhliam nasat avangin player kan inthlak kual lo thei lo a, kan duh angin kan khel lo a ni. A pawimawh ber chu final luh a ni a, final-ah kan theihna zawng zawngin Mizoram tan kan khel ang," tiin a sawi.

Hun tawp lama Maharashtra-in an nawr theih chhan chu, "Kan tlar hnungin an tih tur an tih loh vang a ni pakhat a, kan veng lo leh ṭhin a, an tlan chak si avangin kan buai phah fo a ni. Final-ah chuan ṭha zawkin kan infuihin kan inzir ang," a ti.

Final an thlir e

Mizoram coach chuan group match-a 2-0 a an hneh tawh Punjab chu a dah hniam hauh lo a, "Pumruaah an lian a, tharum an nei a, tawnhriat an ngah bawk a, 'hneh tawh' tia en mai chi an ni lo. Inkhel dang daih a ni dawn a, chutiang tur chuan kan inbuatsaih ang," a ti.

Player inhliam vanga an buai thu sawiin, "Maharashtra kan hneh ṭumin Albert-a ban rek ruh a tliak tih inkhelh banah kan hria a, an cher khawng vek a, a khel thei lo ang. Rozama a khel thei dawn lo chiang a, MS-a leh William-te hi kan enchhin ang a, an khel dawn nge dawn lo kan la sawi thei lo... tu pawhin khel se theihtawpa an khelh chuan an ṭha tawk vek mai," tiin a sawi.

Mala chuan, "Pathian zarah kan cham­pion theih mai kan inbeisei a, Mizo mipuite ṭawngṭaipui kan mamawh khawp mai. Keini chuan kan theihna zawng zawng kan hlan ang, inhliam awm mah se, a damte hian theihtawp an chhuah dawn a ni," a ti.