North London-ah Spurs an lian

Inrinni zan North London derby-ah mualneitu Tottenham Hotspurs-in Harry Kane-a goal hnih hmangin an hmelma leh elpui Arsenal chu 2-1 in an hneh. Spurs hian point 43 hmuin Arsenal chungah an awm.

Arsenal-in inhliam vangin Barcelona aṭanga an lak Alexis Sanchez an chhawr thei lo a, Barca hmelma Real Madrid aṭanga an lak Mesut Ozil an chhawr thei thung. Spurs-in tun hnaia che ṭha Harry Kane leh Christian Eriksen te an chhawr thei a, inhliam vanga buaina an nei lo.

English top flight-ah North London Derby ṭum 160 a awm tawh a; Arsenal hi vawi 66 chak a, Spurs hi vawi 60 an chak thung a, ṭum 44-ah an inhnehtawk. Arsenal-in goal 255 an khung a, Spurs-in goal 219 an khung ve bawk. Record aṭanga thlirin Arsenal an ṭha hret

Ball an pet

Mikhual team Arsenal lamin bul an ṭan ṭha a, ball rang tak taka inpe kualin inkhel an thunun nghal. Minute 11-na lekah Danny Welback chuan mual dinglam sirah ball nen Spurs defender Danny Rose chu chak takin a tlan pel a, a ball cross chu Spurs goalkeeper Hugo Lloris dan rual lohin Ozil-a'n goal-ah a chantir. German midfielder goal bak first half-ah a lut lo.

Spurs-in White Hart Lane-ah tlawm an tum lo, second half-ah mualneitu hian game nung zawk an lantir. Minute 56-naah Spurs-in Kane hmangin an siphurh an sut a, English forward hi tun hnaia a chetṭhat avangin Europe club liante'n an ngaihven a, English media chak vangin tun hnai bikah khawvel player lar a ni pha hial.

Arsenal point khatah an lungawi lo a, goal khung tumin Chuba Akpom, Tomas Rosicky leh Theo Walcott-a te an luh tir a, hun tawpa langsar ber erawh Kane a ni. Spurs forward hian Arsenal defender Laurent Koscielny venna karah minute 85-naah chakna goal a tauh lut a, 2-1 inkhel a tawp.

Engnge an sawi?

Arsenal boss Arsene Wenger chuan,"Referee-in inkhel a thunun ṭha tawk lo a ni. Ka player-te pawhin ṭum dang an pha lo, ball an hloh nasa lutuk a ni," tiin an khelh ṭhat tawk loh thu a sawi.

Wenger chuan, "Hetiang zat goal a thun hnu pawh a ram tana koh a la nih loh chuan ramdangin an ram tana khel turin an sawm mai ang" tiin goal hnih khungtu Kane a fak.

Kane hian England leh Republic of Ireland tana khel thei a, age level-a a khelhna England tan a khelh a rinawm.

Tottenham boss Mauricio Pochettino chuan, "North London derby ka hmachhawn hmasak ber a hnehna kan chang hi ka lawm em em a ni. Ka naupan laiin lo en tawh ṭhin mah ila tuna ka awm dan hi chu ka ngaihtuah phak ngai lo a ni. Ka player-te kha an khel ṭha em em a, a bik takin Harry khan a khel ṭha takzet a ni. Theihna sang tak a neih avangin a theihna ti pung turin theih tawp kan chhuah zel ang." tiin a sawi.