City Chungah Chelsea

Chelsea chuan point sarih laiin Premier League-ah hma an hruai ta. Inrinni khan Chelsea hi Aston Villa khelmualah an chak a, pahnihna Manchester City-in an mikhual Hull City an draw hram.

Villa Park-ah Eden Hazard chuan minute riatnaah goal mawi tak a thun a, hei hi Jores Okore chuan minute 48-naah a sût. Chelsea chakna goal hi Branislav Ivanovic-a'n minute 66-naah ṭha zet maia a khung a ni a, Chelsea 2-1 in an chak. Khelh 24-ah point 56 an hmu ta.

Hull City tan David Meyler chuan minute 35-naah goal a khung a, second half injury time-ah James Milner chuan freekick aṭangin a sût hram a, 1-1 in an inhnehtawk. City hian point 49 an hmu a, tun hnai Premier League inkhel paliah chak an nei lo.

Jose Mourinho chuan point sariha hmahruai chu lawmawm hle mah se ngaihṭhatna tur a nih loh thu a sawi a, England-ah chuan eng inkhel pawh a harsa vek tih a sawi. Manuel Pellegrini chuan a team chuan, "Idea an tlachham," niin a sawi hial. Chelsea-in champion an hnaih tawlh tawlh.

Chelsea an Ṭang rual

Cesc Fabregas a awm lo a, Diego Costa an hrem bawk a, Chelsea player pawimawh pahnihte Inrinniah an inlan thei lo. An khingpui Villa hi game riat chhung chak nei tawh lo, December 20 hnua goal pawh la thun miah lo an ni ve thung.

An inkhel a, minute riatnaah Hazard chuan Willian-a ball fing tak chu rang em em maiin a ti-goal a, Chelsea tlar hma an hmuhnawm ngei mai. Villa lamin beisei aiin an nawr lêt thei a, goal thun lo mah se Chelsea goal bulah an hnawksak thei hle.

Second half an ṭan a, minute 48-naah Carles Gil ball cross chu Okore chuan a tauh goal a, khelmuala minute 659 zet goal an khung loh hnuah an khung ve ta a, Villa fans an hlim ngei mai. He mi hnu hian ṭum hnih vel chu goal hlauhawm an nei a, 'clear chance' erawh an insiam thei tawh lo.

Chelsea-in chak ngei an duh a, Villa tlar hnung inpetper leh pet ṭhelh avanga ball remchang awm chu Ivanovic chuan a dana dan rual lohin a volley goal - he defender hi League Cup final an luhna goal thuntu a ni bawk a, mamawh hunah goal a khung thei hle.

Chelsea an chak a, champion nomawi an hnaih zel.

Mourinho a Ṭawng

A lungawi lohna lantira hun rei tak press hmachhawn duh tawh lotu Jose Mourinho pawh a ṭawng leh ta a, point sariha hmahruai chu ngaihṭhatna tur a la ni lo tih a sawi.

Chelsea boss chuan, "Ram dangte chu ni se a ṭha tawk mai thei a, he ramah hi chuan point sarih hi innghahna tham a la ni lo. Khelh 14 la awmin point 42 kan la inchuh dawn a, inkhel zawng zawng a hautak vek a, eng pawh thleng thei a ni," tiin Premier League club-te chu an inthlauh loh thu a sawi.

Tun hmaa Premier League-a Chelsea champion-pui tawhtu chuan City leh Hull inhnehtawk chu, "He ramah hi chuan eng thil mah hi mak ka ti tawh lo. Eng team pawh hi an chak thei a, Hull City leh Man City inhnehtawk hi a mak ka ti lo. He result avang hian ka phur sawt lo a, kan result-ah bak ka innghat lo... hmahruaitu nih chuan midang result ngaihtuah a ngai lo a, an chak zo lo a nih leh a ṭha a, an chak pawhin kan result zel a pawimawh zawk," a ti.

City an ropui lo

Yaya Toure tel loin City an che thei lo. Tun hnaiah match li chhung Yaya Toure a khel lo a, an chak zo lo vek! Premier League mawng lama awm Hull nen point khat ve ve an hmu a, City hian chak loh an pumpelh hram zawk a ni.

David Meyler-a'n Gaston Ramirez-a thawh­rah senga goal a thun hmain City hian goal hlauhawm an nei lo a; second half-a Edin Dzeko pet keeper Allan McGregor lo dan leh Sergio Aguero crossbar tihper chu an goal thun teuh ber a ni. Injury time a nih tawh hnuah Milner chuan freekick mawi takin a pet kual lut a, hei hi an point hmuh theih chhan a ni.

City boss Pellegrini chuan, "Kan theihtawp chhuah mah ila goal bulah kan buai tlat a ni. Kan chauh vang a ni lo a, kan 'fight' lo pawh a ni hek lo, goal bulah idea kan tlachham a ni ber mai," a ti hlawl mai.

Kum 2009 November hnua a vawikhatna atan a zawnin game li chak an nei tawh lo a, champion tuma an inûmlai takin an che chhia a ni. Yaya Toure leh Wilfried Bony-te lo kir hunah meuh chuan Chelsea hi um phak rual lohin an fâl hman tawh mai thei a, striker mamawhin African Cup of Nations-a khel tur ber kher an lei si a, an muang sual dawn a ang hle?