Barca an chak; Suarez-a'n goal a khung

La Liga-ah Barcelona-in hmahruaitu Real Madrid nena an inkar an ti zim zel. Pathianni zan khan Athletic Bilbao chu 5-2 in an hneh a, Inrinni zana Real Madrid-in Atletico Madrid an hneh loh bawk avangin catalan club leh hmahruaitu inthlauhna hi point khat chauh a ni tawh.

San Mames Stadium-ah Barcelona tan an thiampuipa Lionel Messi bawk a ropui a, goal khat a khung bakah Luis Suarez goal khung tur a siamsak a; Neymar leh Pedro te'n goal khat ve ve an khung a, Bilbao midfielder Oscar De Marcos-a'n an lamah a ti lut bawk.

Inkhel chu

Ṭan aṭanga minute 15-na lekah Messi hmuh tur a awm nghal a, freekick aṭangin Barcelona hma­hruaina goal a khung nghal.

Ṭum dang ang bawk­in Barcelona-in ball possession an ngah a, minute 26-naah inkhel an thununna chu goal-ah a chantir a; Messi ball pass chu Luis Suarez-a'n Barca goal hnihna atan a khung. Uruguayan forward hian match ruk chhung goal a khung loh hnua a goal hmasa ber a ni. Barca-in 2-0 a hmahruai chungin chawlhlawk an hmang.

Second half-ah Athletic Bilbao lamin an la tlawm lo tih lantirin minute 59-naah Rico Moreno hmangin goal khatna an khung.

Bilbao ṭantute hlim authawm pawh a reh hmain minute 62-naah Bilbao mdfielder Oscar de Marcos chuan an lamah a ti goal a, minute 64 naah Neymar-a'n goal a khung leh bawk avangin Barca dinhmun a ṭha hle.

Amaherawhchu minute 66-naa striker Aritz Aduriz goal-in Bilbao beiseina thar a rawn siam a, mah se mualneitu defender Xabier Etxeita chu minute 75-naah Luis Suarez laka a foul vangin hnawhchhuah a ni.

Player tam zawk Barcelona tan Pedro-a'n minute 86-naah goal khat a khung belh leh a, Catalan club 5-1 in an chak.

Barca an buai lo

Media lamin Neymar leh manager Luis Enrique inkarah buaina awm angin an chhuah a; Barca hi Neymar an lak luh dan dik tawk loh vangin an buai a, kum 18 hnuai lam player FIFA dan kalha an lak avangin hrem an ni. Field pawna Barca buaina hi thup sen ni lo mah se khelmualah erawh a buai phah lo.

Hmahruaitu Real Madrid an chak loh laiin, awlsam takin point thum an hlawhchhuak a, champion kalkawng an zawh zel.

South American trio

Lionel Messi, Neymar leh Luis Suarez te hi an chenna ram Argentina, Brazil leh Uruguay-ah team khaipa an ni vek. South America trio te hi Barcelona tan a khel a,an tumpui defender te tan chuan mut ti tui lo tham an ni.

Messi hian tun season La Liga match 22 a khelh tawhah goal 23 a khung tawh a, Neymar hian match 19-ah goal 16 a khung tawh bawk. Goal khung thei lo ber Luis Suarez pawhin league match 12-ah goal thum a khung tawh a, a ṭhiante goal khung tur siam sak kawngah a ṭangkai viau bawk.

South American trio te'n an khelh dan hmang an inhrechiang tulh tulh a, match tinin hmasawnna an nei tih a lang. Player

ṭha pathumte hi an inkawp rem zel a, an hmuhnawm chho tulh tulh ang.

Eng nge an sawi?

Barcelona manager Luis Enrique chuan, "Kan tan chuan zan ṭha tak a ni a, game ropui tak kan khel a ni. Champion tur chuan tuna kan khelh ang hian season tluana kan khelh chhunzawm a ṭul dawn a ni. Vawikhat khelh ṭhat hi a tawk lo tih kan hriat a ngai, tunah hian pahnihnaah kan awm mek a, kan la champion lo," tiin hmasawn zel an mamawh thu a sawi.

Athletic Bilbao manager Ernesto Valverde chuan, "Barcelona kha an khel ṭha em em a, dan ngaihna an awm lo a ni. Team ṭha leh ropui tak an ni," tiin team ṭha lo zawk an ni tih a pawm.

Barca player pawimawh Neymar chuan, "Chelh din theih loh tia han sawi tur em chu kan niin ka hre lo. Mahse, kan (Neymar, Suarez, Messi) theihtawp team tan kan chhuah ṭhin a ni," a ti.

La Liga inkhel dangah Valencia-in Espanyol 2-1 in an tlawm a, table-ah palinaah an chho. Sevilla erawh Getafe lakah 2-1 a an tlawm avangin palina aṭangin panganaah an tla thla thung.