Lyon leh PSG inhnehtawk
Pathianni zan khan French Ligue 1-a hmahruaitu Lyon leh champion lai Paris St Germain te chu 1-1 in an inhnehtawk. PSG hian hmahruai theihna hun ṭha an bawhpelh a, point 50 hmu tawh hmahruaitu Lyon nen an inkarah point hnih chauh a awm.
Lyon khelmual Stade de Gerland-ah mikhual PSG-in ball possession an ngah zawk a, 66% lai an chang. PSG hian shot vawi 14 zet neiin goal zawnah vawi ruk an pet thei a, Lyon lam hian shot vawi sarih neiin goal zawnah ṭum hnih chauh an pet thei thung.
Cameroon striker Clinton Njie-a goal hmangin Lyon in minute 31-naah hma an hruai a; PSG-in second half-ah Zlatan Ibrahimovic penalty hmangin an siphurh an sut a, first half-ah Swedish forward goal khung chu offside vangin pawm a ni lo.
PSG boss Laurent Blanc chuan,"Fist half khan kan khel ṭha tho a, sencond half khan kan khel ṭha lehzual a ni. Goal khung tumin vawi tam tak kan bei a, mahse keeper Lopes kha a khelh ṭhat em avangin kan sutlang zo lo a ni. Ka naute khelh danah ka lawm a, khatiang khan ṭa taka khel zel ka duh a ni. Lyon kha an vannei a, point thum hlawhchhuah kan phu a ni," tiin a sawi.
Lyon boss Hubert Fournier chuan, "Chak theihna hunṭha kan nei a, kan goal neih sa kan venghim zo lo kha a pawi a ni. Champion tur sawi ala hun lo a, hmalam pana kan kal zel a pawimawh a ni" tiin a sawi.