West Brom leh Stoke an vannei

Pathianni zan Premier league inkhelah table hnuai lama awm Burnley leh West Brom te 2-2 in an ṭin a; St. James Park-ah Newcastle United leh Stoke City te 1-1 in an inhnehtawk bawk.

West Brom captain Fletcher

Burnley khelmual Turf Moor stadium-ah West Brom an lenglut a, captain thar Darren Fletcher-a kaihhruaina hnuaiah si hnih an phurh hnuah beidawng loin an 'fight' chhunzawm a, draw result an hlawhchhuak.

Mualneitu Burnley tan Ashley Barnes-a'n minute 11-naah hma­hruaina goal a tauh lut a, minute 32-naah Danny Ings-a'n goal hnihna khung leh a; amaherawhchu West Brom-in captain Chris Brunt first half tawp hma hretin goal khat an sut a, halftime-ah 1-1 a ni.

Second half-ah minute 67-naah Brown Ideye-a'n West Brom tan a khung a, goal dang a luh belh tawh lo.

Nigerian forward Ideye hi West Brom player manto ber a ni a, season tir lama a chet ṭhat loh avangin January transfer khan chhuah tir an tum hman hial a, tunah rih chuan an chelh fuh hle.

Eng nge an sawi?

Burnley manager Sean Dyche chuan, "Inkhel bul kan ṭan ṭhat tehlul nen kan tihsual kan tuar ta a ni. Hei hi Premier League ropuina em em chu a ni. Engtiklai pawhin ṭan mar pat reng a ngai a ni," a ti.

West Brom manager Tony Pulis chuan, "Pathianni zing kar leng chhuak ang maiin ka naute kha an zawi a, player zahve vel kha chu khuma la mu ang maiin an zawi a ni," a ti.

Pulis chuan, "Dre­ssing room-a player-te fuih phur turin kan mamawh a, team kaihruai thei kan mamawh a ni," tiin Fletcher-a captain atana a ruat chhan a sawi.

Scotland midfielder hian tun transfer hman zawh takah khan Man­chester United aṭangin West Brom hi a zawm.

Stoke damna Crouch

St. James Park-a inkhelah first half-ah goal a lut lo. Minute 74-naah Newcastle tan Jack Colback-a'n hmahruaina goal a khung a, chakna goal tura ngaih a ni.

Amaherawhchu, minute 82-naah Peter Crouch chu Stoke-in bench aṭangin an lut tir a, England striker pasang hian minute 90-naah an siphurh sutna goal a khung.

Eng nge an sawi?

Stoke City manager Mark Hughes chuan, "Jack Colback khan goal a khung hma khan red card hmu tur a ni a, red card pek a ni lo kha a vannei hle. Inkhel kan thunun zawk a, vawiinah khan a khel ṭha zawk kan ni," tiin chak phu zawk an nih thu a sawi a, Marc Muniesa leh Victor Moses laka foul Colback red card hmuh loh chu a sawisel tel bawk.