A tawpah United an vannei

Manchester United-in minute 93-naa Daley Blind-a goal hmangin West Ham United an draw hram. Dutch manager Louis van Gaal-a'n Radamel Falcao, Robin van Persie, Wayne Rooney leh Angel di Maria te a kawl nachungin an goal bawh a na tawk lo a, injury time-a substitution a siam dan aṭangin draw-ah a lungawi tih a chiang bawk.

Pathianni zan inkhelah West Ham-in minute 49-naa Cheikhou Kouyate-a volley goal hmangin hma an hruai a, an khelmual Upton Park-ah an chak mai dawna a lan laiin defence talbuai vangin Blind hmangin Manchester United-in injury time-ah an siphurh an sut. Injury time-ah vek hian Manchester defender Luke Shaw-a'n yellow card ṭum hnihna a chawi a, goal dang luh belh tawh loin 1-1 in inkhel a tawp.

Khelh dan hmang

United boss Van Gaal-a'n 2014 World Cup-ah Netherlands pathumna a nih pui a, a player rem dan chu 3-5-2 formation a ni.

Dutch manager hian United-ah 3-5-2 formation a rawn chhawm a, a hlawhtling tawk loh avangin 4-3-3 formation a enchhin leh mek.

Football expert-te leh media lam chuan United formation ngawr ngawr an sawisel lo, player luh tir dan chu a fuh tawk loah an ngai. West Ham an hmachhawn ṭumin tlar hmaah Falcao, Van Persie leh Di Maria te an intlar a; Di Maria hian Argentina leh Real Madrid tan hlawhtling takin field sirah a khel a, a position tharah a man phu tawkin a khel chhuak pha meuh lo.

Tlar hmaa player manto rual pass turin Van Gaal-a'n a rinzawh ngam midfielder ball pass thei a nei lo. Spanish midfielder Juan Mata leh Ander Herrera te bench-ah ṭhuttirin starting eleven-ah midfielder pangngai a dah lo. Captain Rooney, Blind leh Adnan Januzaj te chu forward leh defence thlun zawm tura dah luh an ni a, player pathum hi midfielder ṭha tak tia sawi tur an ni lo vek.

Chhanhimtu De Gea

West Ham midfielder Alex Song pass sual zarah Van Persie-a'n chance a nei nghal a, goal zawnah a pet lo. United midfielder-te ball pass a fing lo a, tlar hmaa player manto-te'n ball ṭha an hmu lo.

West Ham goal bawh a na zawk a, darkar chanve chhung lekin Spanish keeper David de Gea-a'n ṭha tak takin ṭum thum ngawt a dang. United keeper hian Enner Valencia goal khung tur ṭum hnih a dan bakah James Tomkins goal khung tur chu a ke ding lamin a dan sak bawk.

Second half ṭantirh aṭanga minute linaah Mark Noble freekick aṭanga ball kal zel chu Kouyate-a'n box chhungah vawi hnih sepin a volley goal nghal. United tlar hnung a phui lo a, Senega­lese midfielder a class ve hrim hrim bawk.

A tawpah United

Goal luh hnuah West Ham-in goal venhim an ngai pawimawh a, United attack a na sawt. Minute 77-naah Van Persie leh Falcao te'n nalh takin West Ham tlar hnung ṭhiat mah se Colombian forward hian keeper chauh a hmachhawn hnuah goal zawnah pet lo.

Van Persie pawhin chance a nei a, Dutch striker ball pet chu keeper Adrian-a'n a dan sak. Hun tawpah United-in ball an vawrh lut nasa a, West Ham defender-in penalty area aṭanga a clear ṭhat tawk loh avangin Blind-a'n nalh zetin a volley goal.

Goal luh hnuah minute hnih a la awm a, defender Shaw chu fimkhur tawk loh vangin hnawhchhuah a ni a; United draw-ah an lungawi a, hun khawhral nan leh tlar hnung tih phui nan Falcao aiah Chris Smalling an luh tir a, inkhel a tawp zui bawk.

Engnge an sawi?

West Ham manager Sam Allardyce chuan, "Goal kan venhim ṭhat avangin ka player-te ka fak a, kan khelh dan kha a ṭha famkim teuh khawp mai. Hun tawpa kan goal chhuah kha chu United lama kan goal chhuah ṭhin dan a ni lo. United khan vanneihna zawngin ball an vawrh vak vak a, a tawpah an hlawhtling," tiin a sawi.

United manager Louis van Gaal chuan, "First half-ah khan kan khel ṭha tawk lo a, ball kan in pass ngam tawk lo. Second half-ah kan insiam ṭha a, football khel tur chuan tun aia kan huaisen a ṭul a ni," tiin a sawi.