India-ah Mizoram-in Football an thiam ber!

Mizoram chu National Games foot­ball-ah an champion. Santosh Trophy champion nilai Mizoram hian nizana Kozhikode, Kerala-a final khelhah Punjab chu 1-0 in an hneh a, Immanuel HS Lalṭhazuala'n minute 83-naah corner aṭangin chakna goal a thun.

Mizoram hi India rama state-te football inelna Santosh Trophy leh National Games-ah a champion kawp ta a; tun ṭum hi Mizoram-in National Games-a football-a gold medal a dawn vawi khatna a ni.

Mizoram coach K Mal­sawmkima chuan, "Engmah dang chhuan tur kan nei lo. Pathian awmpuina vanga champion kan ni e. Mizoram mioui ṭawngṭai chhuah a ni," tiin an champion hnuah Vanglaini a hrilh.

Tute nge khel?

Mizoram-in inelna ṭantirh aṭanga an hman 4-3-3 formation an hmang. Defence-ah MPL3 best player Lalram­chullova, rawlthar Lalṭhakima, Thomas Lalengkima leh Immanuel HS Lalṭhazuala-te an intlar a, keeper chu Zothanmawia a ni.

Midfield-ah MPL3 best midfielder David Lalrinmuana, MPL1 best mid­fielder Rohmingthanga leh match zawng zawng khel kim vek H. Lalbiakthanga-te an awm a, tlar hmaah Brandon VL Remdika, B. Zoramthara leh MPL2 best forward MS Dawngliana-te an awm thung.

Goal a lut lo

Groupstage-a an inkhelh hmasak ṭumin first half-ah goal a lut lo a, final-ah pawh goal hmuh tur a awm lo.

Mizoram-in ball an chang tam zawk a, captain David-a kaihruaina hnuaiah inkhel an thunun. Mizoram captain ball pet hi Punjab keeper Jagroop Singh-a'n ṭum hnih ṭha takin a dan sak a, Jagroop hi ISL-a Delhi Dynamos keeper a ni.

MPL2 best forward Dawngtea pawhin chance ṭha ṭum hnih a nei a, a chance neih hmasak zawk a pet pial a, a vawi hnihna a dang na lutuk bawk.

Punjab lamin half chance ṭum thum vel an nei a, keeper T. Mawia tana harsa tur a awm lo.

Goal khat a tawk

Second half-ah Punjab-in inrintawkna an nei thar a, an goal bawh a na sawt. Mizoram-in inkhel an thunun thei tawh bik lo a, team pahnih an inhnehtawk hle.

Mizoram forward Zoramthara chu Punjab defender Sarbjit Singh-a'n a tihtluk avangin a insum zo lo a, an inbakkaih zui a, player pahnih hi minute 65-naah hnawhchhuah an ni.

Player 10-a an khelh hnuah Punjab an che ṭha zawk a, minute 70-naah Jaswinder Singh-a'n chance ṭha tak a nei a, a tauh lut lo.

Minute 76-naah Mizoram defence phui tawk loh vangin Punjab-in Gurtej Singh-a hmangin chance ṭha zawk an nei a, Pubjab midfiel­der hian hnai tak aṭangin a tauh over.

Mizoram-in substitute Ladampuia leh William Lalnunfela-te'n Punjab tlar hnung paltlang an harsat a, amah­erawhchu Punjab defender back pass sual zarah Mizoram-in corner an hlawhchhuak a. David-a corner hmasa zawk hlawhtling lo mah se corner vawi hnihna chu keeper Jagroop-a'n a dan sual zarah Zuala'n chiang takin a khung.

Goal luh hun hi minute 83-na a ni a, Mizoram-in gold medal dawng turin goal venhim chiah an mamawh tawh. Mizoram tlar hnung a phui ṭha a, hun tawp hma hretin captain David chu inhliam vangin zawn chhuah ngai mah se Mizoram tlar hnung a nghing phah lo.

Referee final whistle a hâm a, Mizoram chu National Games 2015 football champion an ni.

Boss kamchhuak

Mizoram football team champion-puitu Mala chuan, "Kan inhliam nasatzia kan hria a, kan ṭhat dan berin kan khel thei tawh lo. Kan ṭawngṭai a, Mizoram mipui an ṭawngṭai bawk a, kan theihna zawng zawngin kan bei a, kan vannei ta a ni e," a ti.

Durtlang Leitan-a khawsa, MPL-a Aizawl FC champion-puitu coach chuan, "Kan lawm khawp mai. Lawm­thu sawina tur kan ngah a, sawi mai tur pawh ka hre lo... MFA leh Olympic Association chungah ka lawm a, Aizawl FC hi kan engkima engkim an ni a, kan hotute chungah kan lawm a, Pathian chungah kan lawm ber, Amah vang liau liau a ni... final-ah player 14 chiah thlan tur nei khawpin kan inhliam nasa tawh a ni," a ti a, Mizo mipuite chungah lawmthu a sawi.

Mizoram team hi player paruk ngawt an inhliam a, final-ah player thlan tur dam chiang 14 chiah neiin an khel a ni.