Zaninah Liverpool-in Spurs mikhual dawn

Liverpool-in Arsenal dan zawh loh Harry Kane chelh an tum dawn. Zanin dar 1:30-ah Tottenham Hotspurs leh Liverpool te inkhel hi Star Sports 4-ah a en thei ang. Zanin vek hian Arsenal-in Emirates Stadium-ah Leicester City an mikhual dawn a, Star Sports 2-ah LIVE a pekchhuah tur a ni.

Liverpool Vs Spurs

Merseyside Derby-ah Liverpool leh Everton goal awm loin an inhnehtawk a, North London Derby-ah Spurs-in English forward Kane-a goal hnih hmangin Arsenal an hneh thung. Season thara Champions Lea­gue khelh tum inkhel tur hi a hmuhnawm ang.

Daniel Sturridge-a'n a dam hnuah Liverpool starting eleven-ah a la inlan leh lo. Amah­erawhchu zanina Spurs an hmachhawn hunah erawh bul a ṭan ve ngei a rinawm tawh.

Goodison Park-a inhliam Lucas Leiva a inlan theih loh hmel a, game kaihruai hna captain Steven Gerrard-a'n a chelh ang.

Harry Kane thlipui

Premier League match li chhung goal chhuah tawh lo Liverpool defender tana ven ngun ngai tur chu Harry Kane a ni.

Kum 21-a upa English striker Kane hian tun season-a inelna hrang hrangah goal 22 a khung der tawh a, Premier League player zingah a aia goal khung hnem an awm lo.

Team khaikhinna

Match hnuhnung pangaah Liverpool an chungnung fal hle, Liverpool hian vawi li hnehna an chang a, Spurs hian vawi khat chiah hnehna an chang.

Laipui a puak dawn em?

Arsenal-in kartawp khan White Hart Lane-ah Tottenham hneh lo mah se Emirates Stadium-a an inkhelh hnuhnung ber ṭumin Aston Villa 5-0 in an sawp. Zanina an hmachhawn tur hi table mawngphaha awm Leicester City an ni.

Team pahnih record hi a inthlau hle. Arsenal-in vawi 24 khelhah point 42 an neih tawh laiin Leicester erawh vawi 24 khelh tawhah point 17 chiah an la hlawhchhuak.

Leicester leh Arsenal-te hi an intum hnuhnun ber ṭumin 1-1 in an ṭin a, an inkhelh hnuhnung vawi ngaah Arsenal vawi thum chakin Leicester vawi hnih an chak thung.

Arsenal thiampuipa Alexis Sanchez a dam tawh a, ani hian Premier League match 21-ah goal 12 zet a khung tawh a, zaninah a luh ngei a rinawm.

Arsenal manager Arsene Wenger chuan, "Spurs kan hneh lohna khan min tibuai tur a ni tawh lo," tiin hmalam en a pawimawh thu a sawi.