Africa awptu Ivory Coast

Africa khawmualpuia football inelna sang ber Africa Cup of Nations-ah Ivory Coast an champion.

Pathianni zan inkhel hi 1992 final rematch a ni. Kum 23 liamta khan Ivory Coast-in final-ah Ghana chu penalty shootout-ah 11-10 a hnehin an champion a, khami hnu khan an champion leh tawh lo.

Kumin finalah Ivory Coast leh Ghana bawk an inhmachhawn a, hun pangngaia goal a luh loh hnuah penalty shootout-ah Ivory Coast 9-8 in an chak.

Final chu

Champion tum ve ve an ni bawk a an fimkhur dun hle. Goal thun aiin mahni goal venhim hmasak an ngai pawimawh hmasa zawk a, inkhel hmuhnawm a ni lo.

Ghana lamin ball an chang tam zawk a, 54% ball possession nei mah se goal hmaah an hlauawm loh. Minute 16-naah Max-Alain Gradel chuan Ivory Coast tan chance ṭha a hlah a, Ghana winger Christian Atsu-a'n yard 25 aṭangin a pet goal teuh viau bawk.

Second half-ah inkhel a danglam lo a, team pahnihin goal khung theihna chance an insiam thei lo a ni ber. Minute 90 chhunga goal a luh loh hnuah extra time khelh a ni a, goal a lut chuang lo.

Ivory Coast lamin minute 120 an khelh chhungin goal zawnah vawi khat chiah an pet a; Ghana lam hian ball chang tam zawk mah se Ivory Coast goal zawnah vawikhat mah an pet thei lo.

Penalty shootout-ah Ivory Coast tana pet hmasa ber Manchester City player thar Wilfried Bony-a'n crossbar a pet per ngal a, a dawt chiaha pet Junior Tallo chuan a pet goal lo bawk.

Vawi hnih pet zawhah Ghana 2-0 in hma an hruai, amaherawhchu Ivory Coast keeper Boubacar Barr a che ṭha zui a. Ghana tan Afriyie Acquah, Frank Acheampong leh Brimah Razak te'n an pet goal lo a, Ivory Coast keeper Barr hian chakna goal a khung.

Golden generation

Ivory Coast tana player langsar ṭhin chu Dider Drogba a ni. Chelsea forward Drogba vanglaiin Ivory Coast hi African Cup hi an champion thei lo a, nomawi lak theih loh vangin Ivory Coast 'Golden Generation' leh England 'Golden Generation' an tehkhin hman hial.

Amaherawhchu Golden Generation tawp lamah Ivory Coast-in nomawi an chawi ta. Tlar hnungah veteran defender Kolo Toure a la pawimawh a; Yaya Toure, Gervinho, Wilfried Bony leh Seydou Doumbia te chu Ivory Coast champion-na kanwga player pawimawh an ni.

Engnge an sawi?

Ghana coach Avram Grant chuan, "Chak zo lo mah ila ka team te ka chhuang em em a ni. Final thlen hrim hrim pawh hi hlawhtlinna ropui takah ka ngai. Player-te'n tournament chhungin thil tam tak an zir chhuakin ka hria. Player langsar tak tak awmna kan hmachhawn a; a kan khel ṭha zawk ni chung siin a tawpah penalty shootout-ah kan vanduai mai a ni," tiin a sawi.

Champion team coach Herve Renard chuan, "Kum 23 zet kan lo nghah tawh chu kan nghak chhuak ta, kan champion hi Ivory Coast mipuite tan kan hlan a ni," tiin a sawi.

Ivory boss Herve Renard hian kum 2012 khan African Cup-ah Zambia a champion pui tawh.

Captain Toure chuan, "Cham­pion hi a lawmawm. Club-a cham­pion ai chuan mahni ram tan ngei a champion chu a lawmawm zual bik a ni. Final-ah ṭum hnih kan vanduai tawh a, tun ṭumah kan hun a thleng ve ta," tiin a sawi.

Manchester City midfielder chuan, "Kan champion theih nana pawimawh ber chu kan coach Herve Renard a ni. A tel lo chuan engmah kan ni lo ang. Ani hian African football hi a hrechiang em em a, thawkrim turin min fuih nasa bawk a ni" tiin an coach a fak.