Mizoram Premier League hnathawh a ni - Mala
2015 National Games football inelnaa Mizoram champion puitu coach K. Malsawmkima chuan Mizoram champion theihna chhan chu Mizoram Premier League vang a nih thu Vanglani a hrilh.
MPL chu...
June ni 13,2012 chhun dar 12:00 khan I&PR Auditorium-ah MFA President Lal Thanzara leh Zonet Director RK Lianzuala te chuan thawhhona thuthlung an ziak.
Mizoram football thuneitu sang MFA leh Zonet TV hian Mizoram Premier League buatsaih chungchangah inremna an siam a, local football chu kalphung mumal zawka tihnun thar a ni.
MPL awm hma hian I Day Football 2011-ah Shillong Lajong leh Royal Wahingdoh te an rawn tel a, Mizoram club-te'n Shillong club pahnih hi an ngam lo hle. Final-ah Shillong Derby khelh a ni a, Lajong an chak.
I Day Football 2012 a thlen leh meuh chuan Mizoram club te'n inbuatsaihna ṭha zawk nen inelna an hmachhawn tawh a. I League club ONGC leh club ṭha Oil India te'n Mizo club-te an ngam lo. Mizoram Police FC an champion.
MPL awm hnuah local football a nung thar a, Lammualah inkhel en turin mipui an pungkhawm a, player-te'n rim zawka training an neih avangin inkhel a hmuhnawm sawt bawk.
India ram football-ah MPL rah a lang nghal lo a, MPL awm hnua Mizoram-in Santosh Trophy an khelh hmasak berah Preliminary Round an paltlang lo.
MPL a kal zel a, football hmasawnna a ṭhang zel. Santosh Trophy 2014-ah Mizoram an champion a, India rama state leh state-te football inlena sang bera an chet ṭhat avangin Mizoramin National Games khel theih phah a, an champion zui bawk.
Mala'n a hmu chiang
Mizoram coach K. Malsawmkima chuan, "MPL hnathawh a ni. MPL hi awm ta lo se kan champion kher lo ang. MFA leh Zonet-te'n MPL an buatsaih hi football hmasawnna chu a ni. Kan champion theihna chhan hi MPL hlawhtlinna atana tha leh sum thawhtute, rilru sengtute leh football hmangaiha inkhel enṭhintute te thawhrah a ni," tiin an champion theihna kawngah MPL a pawimawh thu a sawi.
A ropui lai chu
Santosh Trophy champion team leh tuna National Games football champion team hi player dang daih an ni. Champion kawp thei chu captain David Lalrinmuana leh William Lalnunfela-te chiah an awm.
Aizawl FC boss Mala chuan, "MPL awm takah chuan Mizoram team hi vawi khatah pali pawh thlang ila team ṭha tak vek an ni ang. Mizoramin player ṭha kan ngah a, player inhliam chunga National Games football-a kan champion thei hi ka thusawi dikna nemnghetna chu a ni," a ti.
District FA-te
MFA hnuaia District FA pariatte'n hna an thawk ṭha a, league mumal taka kalpui thei lote pawhin player naupang zawk chher chhuah kawngah hma an la ṭha hle. Mizoram hlawhtlinnaah hian Disctrict FA te hnathawh hmuh hmaih a thiang lo.
MPL Club-te
MFA leh Zobet-in Mizoram Premier League an buatsaih a, a hlawhtlinna tura thawh hlawk ber chu MPL Club-te an ni.
MPL Club-te hian kum tluanin player-te training an pe a, hlawh an pe - player naran tak kha player ṭha zawk ni turin an buatsaih. MPL club-te an ṭhat tlan avangin player-te'n pressure hnuaia khelh a thiam phah a, team anga khelh kawngah hma an sawn hle. Tun ṭuma mite hi MPL champion Aizawl FC player deuh vek an ni.
MPL season thum a ral meuh chuan India ramah 'Mizoram-in football an thiam ber' a tih ngam ta.