Gold Medal pet chhuaktu Zuala

2015 National Games football final-a Mizoram chakna goal khungtu Immanuel HS Lalṭhazuala hi HS Lalthianglima fapa a ni a, Bawngkawn tlangval a ni. Final kha ṭum hnih starting eleven a channa a ni a, Lalrozama inhliam vang chauha lut a ni!

Aizawl FC right back Zuala hian Mizoram junior team tan Subroto Cup a khel tawh a; hemi hnu hian Chandigarh Football Academy a zawm a, MPL1 khan Aizawl FC tana khel turin a inziak lut.

MPL1-ah Zuala hian goal hnih a khung a, MPL2-ah goal khung lo mah se MPL3-ah goal khat a khung a, Bethlehem Vengthlang FC lama chakna goal a khung ṭum hian man of the match-a thlan ni.

Aizawl FC-in defender an neih ṭhat avangin Zuala hian khelhna hmun a chang tam tawk lo a, a inlan chhunah erawh a taksa chakna leh a ball pet thiamna a lang fo ṭhin.

National Games semifinal-a Punjab an hmachhawn ṭumin left back Rozama a inhliam a; Zuala hi loh theih lohin a khelh ṭhan lohna left back-ah a khelh a ngai a , tlar hnung lamah a hna ṭha taka a thawh bakah chakna goal a khung bawk. Punjab lama Zuala goal kha Mizoram chanchinah hmun pawimawh tak a chang kum khua tawh ang.