Cricket World Cup a thil thleng langsar zual

February 14, Inrinni aṭangin Cricket World Cup khelh ṭan a ni dawn a, boruak a lian chho ṭan hle. 2015 Cricket World Cup hi Australia leh New Zealand-ah khelh a ni dawn.

Cricket World Cup urlawk nan World Cup thil thleng tawh langsar zualte kan rawn chhawp chhuak e.

England barakhaihtu O'Brien (2011)

2011 Cricket World Cup-ah Ireland leh England an intum a, team inthlau tak an ni.

England an bat hmasa a, run 327 siamin mi pariat an out; Ireland hun a thleng a, run 115 an siam thlen meuh chuan mi 5 an out tawh avangin chak turin England dinhmun a ṭha hle.

Amaherawhchu thilmak a thleng a, Ireland tan Railway Union tana khel Kevin O'Brien arawn dingchhuak a, ball 63 a hmachhawn aṭangin run 113 a vaw chhuak. Irish batsman hian century siam nan ball 50 chiah a mamawh a, Cricket World Cup record a siam.

Khawvel in thilmak a hmu a, O'Brien hian six run vawi ruk vawchhuakin, four run vawi 13 lai a hlapchhuak a, Ireland a chak pui daih.

Beisei loh result (1992)

1992 Cricket World Cup khan South Africa in semifinal lut turin Australia, West Indies, Pakistan leh India te an hneh a, champion tura rin a ni.

South Africa hian semi-final-ah England an hmachhawn a, inkhelh tawp lam ball 13 chauh a awm tawh tihin run 22 siam an ngai a, run 22 hi an vuakchhuah theih chuan semi-final an lut dawn.

Amaherawhchu ruah sur vangin minute 12 chhung inkhelh tih khawtlai a ni. Inkhelh ṭan leh hmain run siam ngai zat dan (cricket rules) hmangin enfiah a ni a, South Africa hian run 22 siam nan ball khat chauh an nei tawh a, an chak lo daih.

South Africa tana bat mektu Brian McMillan chuan, "Ball 13-a run 22 siam a ngai a ni tih kan hriat kha chuan chak turin kan in ring tawh a. Amaherawhchu ruah sur khan engkim a thlak danglam ta a ni," tiin inkhelh banah a sawi.

Hero to zero (2007)

England mipuite'n 'The Ashes' an ngai sang a, The Ashes hi Australia leh England te inelna hming a ni. 2005 Ashes-ah England all rounder Andrew Flintoff a che ropui a, England tan Hero a ni.

2007 World Cup a inherchhuak a, English mipui inbeiseina sang tak nena an thlir Flintoff a che ṭhing. An match hmasa bera an chak loh hnuin Flintoff hi a teammate pakhat nen pedalo-in (lawng te) St.Lucia-ah an lengkual a, a ruih em avangin tuipuiah hian a tla a, an Hotel thlenna staff te'n an chhanchhuah a ngai hial.

Flintoff hi match khat khel thei lo tura hrem a nih bakah a vice captain nihna an hlihsak. Flintoff a mualpho a, England an mualpho.

India tidanglamtu Kapil (1983)

Tunhmain India hian chuti teh­chiamin cricket a buaipui ngai lo. Kum 1983 a rawn herchhuak a, India-in Cricket World Cup final a lut. Final-ah kum 1975 leh 1979 champion West Indies nen an inkhel a, rin loh takin India an champion.

Ṭhumvawra vanduai India an bat hmasa a, khawvela bowling nei ṭha ber hiala an sawi West Indies bowler te'n Indian batsman-te an sawisa.

India vawm hun a thleng a, West Indies batsman ropui Viv Richards chuan sang takin ball a vua a, khawvel mak tih turin Kapil Dev chuan yard 20 vel tlanin mawi takin a man chat, India an chak zui bawk.

Kapil Dev-a ball man (catch) hi cricket World Cup a 'catch' ropui ber ang hial a sawi a ni. Heta ṭang hian India-in cricket a ngaisang a, a bak chu sawi chhunzawm ngai loin kan hria e.

Shane Warne hrem a ni (2003)

Cricket khawvela spinner ropuia an sawi apianga an sawi hmaih ngai loh tur chu Shane Warne hi a ni. 1993 Ashes Series ni hnihna a English batsman ropui Mike Gatting a vawm out-na phei chu 'ball of the century' tiin khawvelin a hria.

Cricketer ropui hi 2003 a South Africa a cricket World Cup khelh a nih dawn ṭumin an ram Australia aiawha tel tura koh a ni. Mahse damdawi hman phal loh a hmang tih hmuhchhuah a nih avangin Shane warne hi thawn haw a ni a, thla 12 chhung cricket khel thei lo tura hrem a ni a, khawvel a dengchhuak. Hemi hnu hian Shane Warne hian ODI cricket a khel leh tawh ngai lo.

Bob Woolmer thihna mak (2007)

2007 World Cup-ah rin loh takin Pakistan-in Ireland an hneh zo lo a, a tuk lawkah an coach Bob Woolmer chu a thlenna Hotel-ah thi a chhar a ni zui. Police te'n he thihna hi an chhui hnuin players, fans leh betting lama inhnamhnawih ṭhin ṭhenkhat chu rinhlelh an ni.

Thla thum hnuah Jamaican police te chuan Bob hi lungphu chawla thi niin an puang.

Pathau thlawk sang Dwayne Leverock (2007)

2007 Cricket World Cup-ah khaw­velin pathau thlawk sang a hmu a, chu chu Bermuda batsman kg 127 a rit Dwayne Leverock a ni. He cricketer hi professional a ni hran lo a, an ram Bermuda-ah chuan jail officer a ni.

2007 Cricket World Cup khan Trinidad & Tobago-ah Bermuda leh India an inkhel a; India batsman Robin Uthappa chuan na takin ball a vua a, kg 127 a rit Leverock chu sang taka zuang chungin mawi em em in ball a man a, Uthappa a out. Khawvelin he catch ropui hi a theihnghilh tawh ngai lo ang.