Chelsea buzawlah Everton an leng lut dawn
Zanin hi Premier League hmahruaitu Chelsea leh an hnuaia awm Manchester City in lan zan a ni.
Zan dar 1:15-ah Premier Chelsea-in an khelmual Stamford Bridge-ah Everton an mikhual ang a, Britannia Stadium-ah Stoke City hamchhawn turin Manchester City an leng lut ve bawk ang.
Tunge pawl zawk ang?
Chelsea kawr a pawl a, Everton kawr a pawl, zaninah a pawl tak zawk an zawng dawn.
Kartawp inkhelah Chelsea-in hun tawp dawna Branislav Ivanovic goal thun hmangin Aston Villa 2-1 in an hneh hram a. Point sarih laiin hma hruai fal mah se Villa Park a an khelh dan aṭanga thlir chuan chak lo thei an ni.
Chelsea lamah an goal thun khawl Diego Costa a khel thei dawn lo a, Atletico player hlui hian tun season-ah goal 17 a khung tawh. Midfielder pawimawh Cesc Fabregas erawh a inlan theih a beiseiawm.
Everton hian kartawp khan Merseyside Derby-ah vannei takin Liverpool lakah point an hlawhchhuak. Tuna an hmachhawn tur erawh Liverpool aia ṭha Chelsea an ni.
Everton hi tun season-a beisei phak lo an ni. Season hmasa khan tun ang hunah hi chuan Champions League an sawi ri a, tunah chuan 12-na an ni mek.
Everton-in Premier League match hnuhnung parukah vawikhat chiah chak an nei a, player dam kimin Stamford bridge an tlawh ang.
Chelsea umtu City
Kar hmasa inkhelah Manchester City-in an khelmual Etihad Stadium-ah James Milner-a goal hmangin Hull City an draw hram. An siphurh sutna goal hi minute 90-naah chauh an khung. Point hnih an hloh avangin Chelsea nena an inthlauhna hi point sarih lai a ni tawh.
Stoke City hi Manchester City tan zuam ngawt chi an ni lo. Stoke hian inelna hrang hranga an match hnuhnung pakuaah hneh loh an tawng lo.
Amaherawhchu Stoke hian captain Ryan Shawcross, Peter Odemwingie, Bojan Krkic leh Erik Pieters te inhliam vangin an chhawr thei dawn lo a, point hlawhchhuah a awlsam lo ang.
City-in an midfielder pawimawh Yaya Toure leh Swansea City aṭanga an lak pound maktaduai 28 man forward Wilfried Bony te chu African Cup an khelh hah avangin an chhawr kher a rinawm loh.
Eng nge an sawi?
Stoke City manager Mark Hughes chuan, "Manchester City tum hi thil awlsam a ni dawn lo. Tunah hi chuan ramsa inhliam hlauhawm tak ang mai an ni a, anmahni khel tur hian kan inpeih a ngai dawn a ni. Chutihrualin kan khelh ṭhat lai taka lo lenglut tur an nih vangin kan hlau bik lo," a ti.
Manchester City winger Jesus Navas chuan, "Stoke City hi team ṭha tak leh inthunun ṭha tak mai an ni a, an khelmuala hneh tur chuan theihtawp kan chhuah a ngai dawn a ni. Kan theihtawp kan chhuah loh chuan Etihad a min hneh ang khan min hneh leh mai ang," tiin nikum August thlaa 0-1 a an lo hneh chungchang a sawi lang.