Vawiinah I League U19 khel tur a hriat dawn Aizawl FC Vs Chanmari FC

Local football-a club inel tawk tak Aizawl FC leh Chanmari FC-te'n chawhnu dar 2:00 hian Lammualah I League U19-a Northeast aiawh tur an zawng dawn.

Vawiin hian Rest of India Zone inkhel hi khelh zawh a ni dawn a, chawhma dar 11:00-ah tla tawh Shillong Lajong leh Royal Wahingdoh te an inkhel bawk ang.

Shillong Derby

2011 I Day Football final-ah Lammualah Shillong Derby kan hmu a, Lajong-in an hmelma Royal Wahingdoh hnehin an champion. Tun ṭuma inkhel tur erawh an junior team-te an ni a, club inhal tak an nih avangin beisei tur nei loh mah se inkhel hmuhnawm a beiseiawm.

Wahingdoh head coach Bobby Nongbet chuan, "Shillong Lajong U19 team-te nen hian tun season-ah kan la intum lo a, tun hi kan vawi khat inhmachhawnna tur a ni. Hneh ngei tumin kan khel dawn a, amaherawhchu player inhliam kan neih avangin Lajong dinhmun a ṭha zawk," a ti.

Shillong Lajong manager Sambha Shallam chuan, "Aizawl-ah kan player-te'n kan training angin an khel chhuak pha lo a, I League U19 final round-ah kan inlan thei dawn lo. Final round khel thei tawh lo mah ila, theihtawp chhuahin kan match hnuhnung ber hi kan khel ang," tiin a sawi.

Final chu?

I League U19 Qualifier hi league-a khelh a ni a, final a awm lo. Chutichung chuan vawiina Aizawl FC leh Chanmari FC hi final ang hiala ngaih theih a ni.

Aizawl FC-in final round thleng turin chak ngei ngei an mamawh a, Chanmari FC tan draw a tawk thung.

Chanmari FC hi an match hmasa berah vanneiin Shillong Lajong chu goal awm loin an draw thei hram.

Aizawl FC coach Nicky Malsawmtluanga chuan, "Chanmari FC aiin Royal Wahingdoh an ṭha zawkin ka hria, kei ni emaw Wahingdoh emaw hian final round kan luh ka ring," tiin a lo sawi tawh.

Chanmari inkhel hmasa ber entu chuan Aizawl boss Nicky-a thusawi hi an ṭawmpui vek ang, Chanmari hian an game hmasa ber an khel ṭha lo. Amaherawhchu Chanmari FC coach Lalsangzuala Hmar erawhin Shillong Lajong nena an intluk tawk thu a sawi thung.

Aizawl FC hian an game hmasa berah Royal Wahingdoh lakah goal an khung hmasa a, hun tawpah an inhnehtawk. An match hnihnaah Aizawl FC-in Chanmari FC nena inhnehtawk Shillong Lajong 1-0 in an hneh.

Chanmari FC boss Sanga chuan, "Aizawl FC chanchin bik hi sawi ṭulna a awmin ka hre lo. Team tin hi an ṭha vek a, a vannei ber an tling ang," tiin a sawi.

Aizawl FC-in Lajong an hneh zawhah Chanmari FC-in Wahingdoh an hmachhawn a, 3-1 in an chak. Chanmari FC-in goal an khung tam zawk avangin vawiin tlaia an inkhelh hunah draw a tawk dawn.

Chanmari FC boss Sanga chuan, "Draw result neih hi thil harsa tak a ni. Aizawl FC aia kan dinhmun ṭhatna bik a awm lo," tiin Vanglaini a hrilh.

Aizawl FC boss Nicky chuan, "Chanmari aiin player kan nei ṭha zawk a, kan chak zawk pawh ka ring. Theihtawp chhuahin kan khel ang, Pathianah engkim kan nghat," tiin final round khelh a inring hle.

Inkhel turte

Chanmari FC match hnuhnung bera starting eleven kha MPL khel tawh vek an ni.

Tlar hnungah Police defender Lalhmunmawia leh BVT FC defender Laldinliana-te an kawl a, club tana rinrawl an ni phak. Wing back-ah India sub junior captain Jerry Lalrinzuala leh R Lalrinsanga te an awm a, keeper H Lalremruata te nen Chanmari senior team tan an khel pha vek.

Anni bakah hian Reitlang winger Jesse Laldinpuia, Chanmari West rinrawl Vanlalbiaa Chhangte leh Lalrinchhana te, BVT midfielder Zosangliana Sailo, Dinthar FC midfielder Sairuatkima leh forward Lalawmpuia bakah Chanmari senior team forward K. Lalchhanhima-te an kawl bawk.

Aizawl FC junior team hi Aizawl DFA hnuai first division-ah an inziak lut a, Mid Season Tournament champion an ni.

Squad tichak turin Dinthar FC midfielder Lalnuntluanga, Police midfielder Lalṭhathanga leh TATA Football Academy chhuak Toky Zomuanpuia-te an lakluh belh. Aizawl FC senior team tana khel pha Lalmuanzova leh Vanlalduatsanga-te an kawl bawk avangin final round lut turin an ṭha tawk.

Chanmari FC aiin Aizawl FC-te hi an khel ho tam zawk a, chu chu team pahnih danglamna chu a ni.