Sterling tan contract thar

Liverpool chuan Raheem Sterling tan contract thar duhawm tak an hlui a, English rawlthar duhawm hi chelh ngheh an tum ruh hle.

Kum 20-a upa Sterling-a contract neih lai hi kum 2017 thleng awh a ni a, kar tin pound 30,000 a hlawh mek a ni. Kar khata pound 70,000 hlawh turin contract thar an zawrh a, inberem tur chuan a hlawh hi tun aia a san belh a rinawm.

Kartawpa Merseyside Derby-ah khan Sterling hi man of the match a thlan a ni a, la upa lo mah se Liverpool innghahnna a ni tawh. Hei avang hian contract thar duhawm zawk an zawrh pawh hi a mak lem lo.

Tunge Sterling?

Raheem Sterling hi Jamaica rama piang a ni a, British khua leh tui nihna nei thung. Sterling hian England tan ṭum 13 a khel tawh. Liverpool winger hian club tan Premier League game 83 a khel tawh a, goal 16 a khung tawh bawk. Kum 2010 khan Queens Park Rangers Academy aṭangin Liverpool hi a zawm a ni.

Liverpool boss Brendan Rodgers chuan,"Contract thar ziak turin kan in dawr mek. Player naupang takte hian zir tur leh hmasawnna tur an la nei ṭhin. Mahse hei hi pawisa tam tham takin a ti chhe ve thei. Raheem tan chuan Liverpool a awm hi a hmasawn zel nan a ṭha ber rih a ni," tiin a sawi.

Rodgers chuan, "Raheem nen pawh vawi tam tak kan inbe tawh a, he hmunah hian a hlim em em a ni. Player naupangte ni mah se theihna sang tak a neih avangin amahah hian beiseina sang tak kan nei a ni. Tlar hmaah chuan a khel kual thei vek a, chonna tam zawk hmachhawn turin a inpeih tawh hle a ni," tiin Sterling chu a fak hle.