National Games football-a gold medal latute February 14-ah ropui taka hmuah tum
February 14 hian kawr sen ha chungin Mizoram football team hmuah an ni dawn!
Mizoram Football Association chuan National Games 2015-a gold medal latu, Mizoram football team-te chu February 14 hian ropui taka hmuah a tum.
MFA thuchhuahin a tarlan danin nimin khan meeting neiin National Games football-a gold medal dawn lawm dan tur hi an rel a, he hunah hian MFA Patron J Lalhmachhuana'n lawmthu sawi ṭawngṭaina a hmang.
MFA chuan National Games-a champion thei Mizoram team chu a chhuang a, players leh coaching staff-te inpekna chu fakawm a ti a, player thawhtu football club-te leh player chhungte chungah lawmthu a sawi a, Mizoram football team duhsaktu Mizo mipui zawng zawng chungah lawmthu a sawi.
Mizoram football team hian Inrinniah Lengpui Airport an lo lut dawn a, MFA chuan Mizoram football team hmuak turin Mizo mipui zawng zawng a sawm. Lengpui Airport-a kalte tan 'champion lawmna sawhchiar' siam a ni ang a, chumi hnuah Lammual panin an chhuak ang.
Tlai dar 4:00-ah Lammualah champion lawmna hun hman a ni dawn a, he huna tel tur hian MFA chuan Mizo mipui zawng zawng a sawm a, lawmna programme kimchang hi tihchhuah a la ni leh ang.