Harry Kane thlipui daltu Balotelli

Tottenham Hotspurs forward Harry Kane-a'n goal a khung chhunzawm zel a, Spurs erawh an chak reng bik lo. Thawhlehin zan khan Mario Balotelli goal hmangin Liverpool-in London club Spurs hi 3-2 in an hneh.

Anfield-ah Liverpool tana Lazar Markovic hma­hruaina goal chu Kane hmangin Spurs-in an sut a, first half-ah 1-1 a ni.

Second half ṭan ṭanga minute riatnaah Steven Gerrard hmangin mualneitu lamin hma an hruai nawn a, Mousa Dembele hmangin Spurs-in an sut. 2-2 a nih hnuah Italian forward Balotelli chu bench aṭanga rawn lutin minute 83-naah chakna goal a khung ta a ni.

Sterling-a tel lo

Thla nga chhung inhliam hnuah Daniel Sturridge-a'n Liverpool tan bul a rawn ṭan a, amaherawhchu tun hnaia che ṭha em em Raheem Sterling erawh hliam vangin squad-ah telh a ni lo. Spurs starting eleven-ah Christian Eriksen leh Kane te chu an ni.

Inkhel chu

Liverpool-in an khelmualah bun an ṭan ṭha. Ṭan aṭanga minute 15-na lekah Lazar Markovic hmuh tur a awm nghal a, Benfica player hlui hian Sturridge ball siamsak chu Liverpool hmahruaina goal atan a khung.

Liverpool-in hma an hruai rei lo, Erik Lamela pass chu Kane-a'n goal-ah a chantira a, minute 26-naah 1-1 a ni.

Goal chhuah hnuah Liverpool an insiamṭha a, Sturridge-a'n mawi taka a 'back-heel' chuan goal ban a per a, Spurs an him. Chawlhlawkah 1-1 a ni.

Second half-ah Liverpool bawkin goal an khung hmasa zawk a, minute 53-naa Danny Rose laka Sturridge-a penalty hlawhchhuah chu captain Steven Gerrard-a'n a pet goal. Vawi hnih hmahruai hnuah Liverpool an la insiamṭha chuang lo, tlar hnung an ti phui thei lo. English forward Kane-a thawhrah sengin Mousa Dembele-a'n minute 61-naah Spurs goal hnihna a khung, 2-2 a ni.

Minute 74-naah Liverpool manager-in vanneih beiseiin Sturridge aiah Balotelli a dah lut a. Italian forward hian Premier League game 12-ah goal a khung tawh lo. Brendan Rodgers risk a la fuh - minute 83-naah substitute Adam Lallana cross chu Balotelli hian goal-ah a chantir a, Liverpool 3-2 in an chak.

Show neitu Balotelli

Thawhlehni zana Liverpool leh Totten­ham te inkhelh hmaa sawi hlawh ber chu tun season a goal 22 khung tawh Harry Kane a ni. Real Madrid nena an sawi zawm hial Spurs striker hi Liverpool an hmachhawn ṭumin a cheṭha a, goal khat leh assist vawi khat a nei. Amaherawhchu inkhelh bana sawi zui hlawh erawh Balotelli a ni.

AC Milan striker hlui hian vawi 13 nan substitute aṭangin a inlan a, Liverpool chakna goal a khung. Liverpool boss Rodgers-a'n club tana khel pha tur chuan practice-naa a chet ṭhat a ngaih thu a lo sawi tawh a, tunah chuan match pawimawhah chakna goal a khung. Italian forward hi field chhungah kan hmu tam sawt ang.

SAS aiah SAB?

Season ṭan dawnah Liverpool-in an Luis Suarez chu Barcelona hnenah pound maktaduai 75 in an hralh a, a thlakna tur an zawng. A tawpah AC Milan aṭangin pound maktaduai 16 sengin Mario Balotelli an lalut a, a nungchang leh a mizia te hre sa vek mah se Liverpool manager Brendan Rodgers-a'n a siamṭhat theih a inring a, season chanve a zawh meuh chuan Rodgers hian sawisel a tawk nasa hle.

Rodgers an sawisel hi a mak lo. Italian forward hian vawi 18 khelhah goal hnih chiah a khung. Champions League group stage-ah Ludogorets Razgrad leh League Cup-a Swansea City an hneh ṭumin a khung Spurs lama a khung hi Premier League-a a goal hmasa ber a ni.

Italian forward hi a che ṭhat zel chuan season liam taa an sawi lar SAS (Suarez And Sturridge) aiah SAB (Sturridge And Balotelli) an sawi vul thar ang. Hei erawh beiseina nena thlir chi chauh a la ni.

Engnge an sawi?

Liverpool assistant manager Colin Pascoe chuan, "Game harsa tak a ni dawn tih kan hria a, point thum kan hlawhchhuak thei hi a lawmawm hle a ni," a ti.

Balotelli chungchang sawiin Pascoe chuan, "Training naah a thawkrim em em a, tunhnaiah damlohna te'n an tlakbuak a, chuti chung chuan a theihtawp a chhuah a, goal khung hi a phu a ni," tiin a sawi bawk.

Tottenham manager Mauricio Pochettino chuan, "Game ropui tak kan khel a ni. Result-ah lawmna tur nei lo mah ila, ka naute khelh dan khan minti lawm hle. An theihtawp an chhuah a, an khel ṭha em em a ni. Hnehna chan ngei tumin kan khel a, hei aia result ṭha zawk hi kan phuin ka hria," a ti.