Olympic-ah LeBron James?

USA Basketball chuan Tokyo Olympic khel tur player 44 hming a pho chhuak a, an zingah hian LeBron James pawh a tel, player tarlan hi an kal vek dawn tihna erawh a la ni lo - an la inthlifim leh ang.

James hian 2004, 2008 leh 2012 te khan Olympic a lo khel tawh, an ram tan hian gold medal vawi hnih a hlawh chhuak tawh. Player koh chhin zingah hian Olympic emaw World Cup-a US tana gold medal la tawh player 19 ngawt an awm.

Hming tarlan zingah hian James-a'n Los Angeles Lakers tana a khelhpui Anthony Davis bakah Houston Rockets star James Harden pawh a tel. Golden State Warriors thiampuipa Stephen Curry chu hliam vangin chawl mek mah se koh chhin zingah a tel tho.

USA Basketball managing director Jerry Colangelo chuan, "Player ṭha an tam a, chung zingah chuan ram tana mi inpe leh khel ṭha tluangte kan en uluk hle bawk," tiin a sawi. James hian nikum December thla khan, "Olympic ka khel mai thei," tiin a lo sawi tawh.