SpongeBob-in Unhinged a ngam lo

Box Office-ah kar hmasaa sum lalut tam ber dawttu 'Unhinged' chu sum lalut tam ber a rawn ni a, 'The SpongeBob Movie: Sponge On The Run' chu pahnihna a ni ve thung. 'Words on Bathroom Walls' chu pathumna a ni ve bawk.

'Unhinged' hi khawvel ram dangah tlangzarh a nih hnu thla eng emaw zat a ral hnuah US-ah chuan August 14 khan an tlangzarh ve chiah a, tlangzarh a nih karah theatre tam ber khar a la ni bawk nen a sum lakluh a tam tham lo hle. Tun kartawpah erawh kha chuan $4,000,761 lai a lalut ta a, Box Office Mojo lam chuan theatre engzatah nge chhuah a nih tarlang chiah lo mah se US theatre inhawn dan dinhmun thlir chuan a sum lakluh hi a ṭha hle.

Lockdown hnua theatre hawn a nih leh aṭanga kar tawp vawi khata $maktaduai lalut leh thei hmasa ber film a ni a, hei hian hlut a hlawh zia a tilang chiang awm e. Khawvel pumah phei chuan $13,002,362 lai sum a lalut tawh a ni. Russell Crowe channa thriller film-ah hian Caren Pistorius, Gabriel Bateman, Jimmi Simpson leh Austin P. McKenzie-te pawh an chang a, Russell Crowe bik hian fak a hlawh hle.

'Unhinged' hi hripuiin khawvel a chawhbuai hnua khawvel pum huap ang movie 'theatrically release' hmasa ber a ni a, hei hi a chhinchhiah tlak hle a ni.

Chart hmasaa sum lalut tam ber 'The SpongeBob Movie: Sponge On The Run' hi US-ah chiah tlangzarh a la ni a, tun kar tawpah khan theatre 326 aṭangin $550,000 a lalut a ni. Tlangzarh kara a sum lakluh nen $1,415,824 a lalut leh der tawh. 

Sum lalut tam pathumna 'Words on Bathroom Walls' chu film tlangzarh thar a ni a, pangna 'Cut Throat City' pawh film tlangzarh thar a ni bawk. Box Office Mojo chuan tun chart-ah hian film 26 a tarlang ve tawh a, Tulsa (12) leh Tesla (13)-te chu film thar lang an ni bawk a ni. Tun ṭum chart-ah pawh hian film re-release lang a awm leh nual a ni.

Boruak pangngai ang chu la pha lo mah se kar hmasa lam nena khaikhin chuan theatre hawn pawh a tam ve tawh hle a, 'Words on Bathroom Walls' phei chu theatre 924-ah lai an chhuah tawh a ni. Hetianga theatre hawn a pung zel a nih chuan sum lengvak pawh a tam leh anga, film ṭha tlangzarh hun an sawn an sawn ho pawh an rawn inlar ṭan leh thuai turah beisei ang.

1    Unhinged    $4,000,761

2    The SpongeBob Movie: Sponge On The Run    $550,000

3    Words on Bathroom Walls    $419,173

4    The Goonies (2020 Re-release)    $260,000

5    Cut Throat City    $243,379

6    Star Wars: Episode V - The Empire Strikes Back (2020 Re-release)    $230,000

7    Peninsula    $213,415

8    Jurassic Park (2020 Re-release)    $180,000

9    Back to the Future (2020 Re-release)    $140,000

10    The Tax Collector    $123,177