Ibra-a'n Eiffel Tower thlak turin a lim a duh

France museum ropui Musee Grevin chuan Thawhṭanni khan Paris Saint-Germain striker Zlatan Ibrahimovic-a lim sathaukhawn (wax) hmanga siam an tar chhuak.

Swedish player ropui Ibrahimovic lim hi Pele tih lohah chuan he museum-a footballer lim an dah hmasak ber a ni.

Kum 33 a upa Ibra­himovic chuan, "Khaw­vela museum ropui ber pawl Grevin-ah ka lim an dah ve ta mai hi ropui ka ti a, chawimawina ropui tak niin ka hria. Mipui tam takin ka lim keimah ang tak mai an tlawh thei ṭhin tur hi a pawimawh lai chu a ni. Nakinah chuan Eiffel Tower hi ka lim hian la thlak se a ṭha ang," tiin uang thuang takin a ṭawng zui.

Ibrahimovic hian a lim thla a lakpuina chu instagram-ah phochhuakin, "Ding-lama mi hi sathau­khawn hmanga siam a ni a, veilam a mi hi 'thir' hmanga siam a ni," tiin amah tak chu thir hmanga siam a nih thu a sawi.