India leh Nepal kan inthlau lo - Constantine
India national coach Stephen Constantine chuan India leh Nepal te chu an inthlauh loh thu a sawi.
India hian FIFA World Cup pre qualifier-ah Nepal an khelh pui dawn a, he inkhela chak zawk hian World Cup qualifier group stage-an khel thei ang. World Cup pre qualifier hi ṭum hnih khelh a ni dawn a; March 12-ah India-ah an khel ang a, March 17-ah Nepal-ah an khel leh ang.
Inkhel tur thlirlawkin Constantine chuan, "Team pahnih tan game harsa tak a ni ve ve ang. Tunhnaiah India hi kan tlahniam nasa em em a, Nepal erawh hma an sawn nasa em em thung. Team ṭha zawk kan awmin ka hre lo a, kan inkhel tawk khawp ang. Kan khelmualah kan khelh hmasak dawn avangin kan chance erawh a ṭha zawkin ka hria," a ti.
Nepal coach hlui Constantine chuan, "India tan hnehna chan ngei ngei a pawimawh dawn a, chang ngei turin kan theihtawp kan chhuah bawk ang. Nepal lam hian an theihtawp chhuahin min bei dawn tih hi hriatsa a ni a, chumi lo bei let tur chuan kan inbuatsaih a ngai dawn a ni," a ti. Constantine hian Nepal coach a nih laiin a hna thawhṭhat vangin Nepal Lal hnen aṭangin 'medal' a dawng nghe nghe.
India tan World Cup qualifying round a chet ṭhat hi a pawimawh dawn hle. Qualifying round a ram che ṭha zual hian qualifying round khelh ngai loin 2019 Asian Cup khelh turin an tling dawn a ni.