Laipui a puak; Arsenal an chak

Thawhlehni zan Premier League inkhelah Arsenal-in an mikhual Leicester City 2-1 in an hneh a, goal hnih Mesut Ozil thawhrah aṭanga lut a ni.

Emirates Stadium-ah ṭum dang ang bawkin inkhel entu an ṭhahnem a. Mipui 60,032 hmaah inkhelah Arsenal-in bul an ṭan ṭha a, minute 27-naah Laurent Koscielny-a'n German midfielder Ozil-a corner pet chu goal-ah a chantir a, first half tawp hma minute linaah Ozil-a pass chu Theo Walcott-a'n a volley goal bawk.

Second half-ah Leicester City an insiamṭha a, minute 61-naah Andrej Kramaric chuan English football-a a goal hmasa ber a khung a. Mikhual team an cheṭha chhunzawm a, Arsenal-in goal venhim hna an thawk a. Leicester tan Riyad Mahrez a khel ṭha a, French midfielder hian ṭum li vel zet chance nei mah se goal a khung lo.

Hun tawp thlengin Arsenal an ṭang tluan thei a, North London Derby-a chak lo Arsenal-in an khelmual Emirates Stadium-ah point thum an hlawhchhuak.

Inhliam an dam

Arsenal thiampuipa tun season-a league goal 12 khung tawh Alexis Sanchez chu a inkhel leh thei tawh a, Ozil nen starting eleven-ah an tel thei ve ve. Player pahnih hi Arsenal game ti hmuhnawmtu leh chakna an ni. Hun pawimawha an rawn kir thei hi club tan chuan a lawmawm hle ang.

Amaherawhchu

English forward Walcott thlaktu mid­fielder Aaron Ramsey chu field chhungah minute khua chauh a awm hman tihah tihrawlna vangin minute 73-naah lakchhuah leh nghal a ni. Ramsey hian nikum December-a Galatasaray nen an inkhel ṭumin hliam a lo tuar tawh a, kar ruk chhung a chawlh phah - tun ṭumah hian a khelh theih loh hunchhung a la hriat loh.

Thawhlehni zan inkhelah hian inhliam vangin Sanchez pawh lak chhuah a ngai a, Chilean forward hi Leicester defender Matthew Upson nena inhmachhannaah a khup a ti na a ni. Sanchez erawh a inliam hi a serious lo niin a lang.

Tun dinhmunah Arsenal hian inhliam an ngah hle; Jack Wilshere, Alex Oxlade-Chamberlain, Mikel Arteta, Mathieu Debu­chy, Serge Gnabry leh Abou Diaby-te chu inhliam vangin chhawr theih an ni lo vek.

Boss thukhawchang

Arsene Wenger chuan, "First half khan inkhel kan thunun thei a, goal khung turin hun ṭha kan insiam thei kha a lawmawm hle a ni. Second half-ah Leicester khan an rawn khel ṭha hle a, an hlauawm thei hle bawk. Point thum kan hlawhchhuak thei hi kan lawm hle," tiin inkhel chungchang a sawi.

Arsenal boss chuan, "Tunah hian player inhliam kan ngah a, a buaithlak hle. Ramsey kha a hliam ngai bawk kha a ni em ka hre lo a, chanchin ṭha lam ka beisei. Alexis pawh hliam na tak a ni lo turah ka ngai. Doctor ka la hmuh loh avangin an dinhmun chiang takin ka la sawi thei rih lo. Pathianni-a Middlesbrough nen FA Cup kan khelh turah Alexis hi chu a khelh theih ka beisei," tiin a player inhliam chungchang a sawi.