Premier League-in pawisa an dawng hnem
Sky leh BT Sport te'n season thum chhung Premier League inkhel TV rights nei turin pound tluklehdingawn 5.136 an chawi dawn a, an contract thar hian season 2016-19 chhung a awh ang.
Sky leh BT Sport
TV rights punna hi 70% a tling pha hial a, 2013-16 season chhung atan Sky leh BT Sport te'n Premier League inkhel live turin pound tluklehdingawn thum an chawi thung.
Sky hian season khata match 126 live turin pound tluklehdingawn 4.17 an chawi tawh dawn a; tunah hi chuan kum khata match 116 live nan pound maktaduai 760 chauh an chawi a, a punna hi a tam hle a ni. Sky contract tharah hian Zirtawpni leh Pathianni inkhel a tel dawn a, Zirtawpni zan inkhel hi ruahmanna thar a ni.
BT hian match 42 pechhuak turin pound maktaduai 960 an chawi dawn a, a hmaa an contract nen a let li laiin a pung thung.
Grassroots hmasawnna
Football expert (Pundit) leh politician te chuan pawisa punna hi supporter-te leh grassroots football-in hlawkpui thei se an duh thu a sawi.
Sky Sports-a TV pundit Gary Neville chuan, "Inbiakremna lian tham tak a ni. Nghawng ṭha tak nei se ka duh hle a ni. Ticket man tlawm zawka hralh theih ni se, grassroots football changtlung zawka buaipui ni thei se a duhawm hle a ni," tiin a sawi.
Liverpool defender hlui Jamie Carragher chuan, "Ticket man tih danglam a ṭul a, a bik takin 'Away Fan-te' ticket man hi tih hi enawn a ṭul a ni," a ti.
Premier League chief executive Richard Scudamore chuan, "Club tena an duh hmasak ber chu stadium khat entu neih a ni. Supporter naupang zawkte tih phur dan an ngaihtual a ṭul a, club hian thutlukna ṭha tak an siam ngei ka ring," tiin a sawi.
Scudamore chuan sawi chhunzawmin, "Mipui hian Premier League-ah star player an hmu duh a, tranfer tawp nia thil thleng khan a ti chiang a ni. Thil mak deuh chu pawisa ang zawnga chhut chuan Ajax aiin Burnley an lian tawh zawk. Tuna kan inbiakremna hi English football tan thu lawmawm a ni,"tiin a sawi.
Premier League thuchhuak chuan grassroots project atan kum khatah pound maktaduai 56 an dah hran thu an sawi a, chu project-ah chuan artificial pitches 50 siamna a tel thu an sawi bawk.