Northeast aiawh tur Chanmari FC
Chanmari FC Under 19 team te'n nimin khan Aizawl FC Under 19 team 3-1 in an hneh a, I League Under 19 final round-ah Northeast aiawhin an khel ang.
Nimin khan Lammualah Rest of India Zone qualifier khelh zawh a ni a, Shillong Derby-ah Shillong Lajong-in Royal Wahingdoh 3-2 in an hneh.
Shillong Derby-ah Lajong
Beisei nei tawh lo inkhel ni mah se, derby a nih miau avangin Shillong Lajong leh Royal Wahingdoh inkhel a nung ṭha hle.
Lajong-in bul an ṭan ṭha a, Hardy Cliff hmangin minute 10-naah hma an hruai a, minute sarih hnuah Sheen Stevenson-a'n goal dang a khung leh bawk.
Team pahnih an inhnehtawk a, inkhel boruak a ṭan avangin Wahingdoh player Rakesh Pradhan chu minute 40-naah hnawhchhuah a ni. Player 10-a an khelh hnuah Wahingdoh game a fuh zawk a, minute 43-naah Anong Shanubam hmangin goal khat an khung. Second half ṭan aṭanga minute sarihnaah Shanubam-a'n a goal hnihna khung lehin 2-2 a ni.
Wahingdoh-in an elpu lakah tlawm tum lo mah se an tlem zawkna a lang a; minute 66-naah Hardy-a'n Lajong chakna goal a khung.
Chanmari FC an dingchang
MPL3 final-ah Aizawl FC-in champion lai Chanmari FC hnehin an lallukhum an chhuhsak. Chanmari FC U19 team-te'n an senior team tan phuba an laksak a, I League U19 final khel tur zawnnaah Chanmari hian Aizawl FC an hneh.
Chanmari tan I League U19 khel turin draw a tawk a, chuti chung chuan huaisen takin chak tumin an khel. Minute 18-na lekah Lalrinsanga corner chu Aizawl FC keeper David Lalrinpuia'n a man sual a, Lalawmpuia'n a pet goal chiang hle.
Chanmari FC an chungnung chhunzawm a, first half tawp hma hretin goal khungtu AwP-a'n penalty a hlawhchhuak a, K. Lalchhanhima'n goal-ah a chantir a, first half-ah 2-0 a ni.
Second half ṭan tirhah Aizawl FC game ṭha mah se a ṭha rei lo. Chanmari FC forward AwP-a'n a vawi hnihna atan penalty a hlawhchhuak a, penalty chawitu Stephen Lalnunmawia chu hnawhchhuah a ni. Lunglei rawlthar Tetepuia bawk rawn pen chhuakin Chanmari goal thumna a khung.
Goal thum luh hnuah Aizawl FC an zuai mai lo, player 10 ni chungin huaisen takin an khel a, minute 69-naah substitute Lalmuanzova thawhrah sengin Jonathan Lalhriatkima hmangin an khung a, 3-1 a ni.
Aizawl FC-in chak turin minute 20 chhungin goal thum dang khung an mamawh a, amaherawhchu player 10-a Aizawl FC rawltharte'n goal an khung belh thei tawh lo. 3-1 in inkhel a tawp a, Northeast aiawh tur chu point sarih hmu thei Chanmari FC an ni.
Engnge an sawi?
Aizawl FC coach Nicky Malsawmtluanga chuan, "Chanmari FC-in chak an phu a, kan ngam lo deuh a ni. Penalty ṭum hnih kan hmu a, referee thutlukna kha ka ṭawmpui, sawisel tur kan nei lo. I League U19 khel tur squad-a player paliin National Games an khel ta daih a, an awm ta lo kha kan tuar deuh chuan ka hria. Chanmari FC final round an khelh turah duhsakna ka hlan e," tiin a sawi.
Chanmari FC coach Lalsangzuala Hmar chuan, "MPL awm tirh aṭangin manager Zama (Larozama) leh assistant coach Samuel-a te nen thawhhona ṭha tak kan nei a, Chanmari FC-in I League Under 19 kan khel thei tur hi kan lawm hle a ni," tiin a sawi.
Coach Sanga enkawlna hnuaiah Chanmari FC hian MPL1 leh MPL2 Under 17 inelnaah an champion tawh a, I League Under 19 qualifier an vawi khat khelhnaa final round an thleng nghal hi hlawhtlinna ropui tak a ni.
Inkhel thlirna tawi
February 11, Nilaini
Royal Wahingdoh 2 - 3 Shillong Lajong
RW : Anong Shanubam 43', 52'.
Lajong : Hardy Cliff 10', 66'; Sheen Stevenson 17'.
Aizawl FC 1 - 3 Chanmari FC
AIZ : Jonathan Lalhriatkima 69'
CFC : Lalawmpuia 18'; K. Lalchhanhima 45+2' (P), 60'(P)
Team Dinhmun
# Team PLd W D L GF GA GD Pts
1 Chanmari FC 3 2 1 0 6 2 4 7
2 Shillong Lajong FC 3 1 1 1 3 3 0 4
3 Aizawl FC 3 1 1 1 3 4 -1 4
4 Royal Wahingdoh FC 3 0 1 2 4 7 -3 1