India tana medal latu Manu Bhaker

Nimin tlai khan Indian chuan Paris Olympic 2024 neih laia India medal hmasa ber a la. Hmeichhe 10m Air Pistol huangah Manu Bhaker-i chuan bronze medal a kap chhuak.

Kum 22 mi Bhaker hi Indian hmeichhe zingah shooting huanga Olympic medal la thei hmasa ber a ni, point 221.7 hmuin silver medal latu South Korean mi Kim Yeji chuan point 241.3 hmuin, pakhatna chu South Korean nula tho Oh Ye Jin (243.2 points) a ni.

Infiamna khawmpui lian Paris Olympic 2024 hi Zirtawpni zan khan an hawng a, nimin tlai thleng khan Australia chuan gold medal pathum la tawhin hmahruaitu an ni mek, inelna hi neih chhunzawm reng a nih avangin an dinhmun erawh a danglam thei reng thung.

Ram hrang hrang 206 zinga 18 ten medal an la tawh a, gold medal lak theih hi 329 a awm dawn avangin inlehthal theihna kawng a inhawng zau dawn hle a ni - India pawhin tun hma aia tam medal lak ngei tumin infiammi 100 chuang a tir chhuak.

Vawiin hian India infiammite inlan an awm nual dawn. Archery, badminton, rowing, shooting, table tennis leh lawn tennis huangah an inlan dawn. Inkhel hi TV kaltlang chuan Sports 18-ah en theih a ni a, Online a en duh tan Jio TV-ah a thlawna en theih a ni bawk.