MPL4 Playoff Reitlang nge tling dawn Upper Republic?

Mizoram Premier League Season 4 khel tur team pariatna vawiin hian a hriat ang. Reitlang FC leh Upper Republic FC te'n tlai dar 2:00 hian Lammualah hmunruak pakhat hi an inchuh ang.

Reitlang FC leh Upper Republic FC te hian February 5, Ningani khan first leg an khel tawh a, 5-5 in an inhnehtawk. Playoff second leg hi tling tur hriatna tur inkhel a ni.

MPL4 khel turte

Mizorama football inelna sang berah champion lai Aizawl FC, Chanmari FC, Mizoram Police FC, Chanmari West FC, Dinthar FC leh Bethlehem Vengthlang FC te chu team awm sa an ni a, MPL4 Qualifier champion Luangmual FC chu tling thar an ni.

Reitlang lam hi...

Mizoram Premier League season hnih kan hmuh tawhah pasarihnain MPL an khelh chhunzawm zel. MPL2 Playoff-ah Luangmual FC an chak a, MPL3 Playoff-ah Chanmari West FC an chak. MPL4 Playoff first leg khelh zawh aṭanga thlirin Reitlang FC dinhmun a ṭha zawk.

Reitlang FC-in foreign player bakah state pawn player kawl tawh lo mah se first division tan chuan awlsam taka hneh theih an la ni lo ang.

Reitlang hian MPL1-a Dinthar FC champion puitu leh MPL2-a Luangmual FC final thlenpuitu R. Lalthantluanga an kawl a, Lalmama hian first leg-ah goal hnih a khung; en bik a sual lo ang.

Upper Republic FC ve thung

First leg-ah tlar hnung lama bang rinawm captain Lalrem tluanga leh Siarhruaia bakah midfield laia game kaihruaitu Israel Ramhmachhuana te awm loh an tuar a, goal nga ngawt an chhuah.

Upper Republic president R. Lalhrilliana'n an player inhliamte la dam loh thu Vanglaini a hrilh a, an defence a phui mai a rinawm loh. A ṭha lam zawnga thlir chuan first leg-ah goal nga an khung thei a, Reitlang tlar hnung a phui bik lo.

Upper Republic-in Lalruatpuia leh Ramdintluanga te tlar hmaah an nei a, Reitlang tan chuan fimkhur a ṭul khawp ang.

Eng nge an sawi?

Reitlang FC secretary Zonun­sanga Pachuau chuan, "Theihtawp kan chhuah ang a, tlang hram chu kan tum ang. A bak chu tih ngaihna a awm lo. Upper Republic hi team huphurhawm ka ngai lo a, 1st leg-a goal a luh tam avangin keini tan chuan draw a tawk a rinawm, kan tlang ngei ka beisei," tiin a sawi.

Upper Republic FC president R. Lalhrilliana chuan, "Kan player inhliamte an la dam chuang lo. Anni bakah hian Class XII exam tur an awm avangin player kan chan bawk a, kan squad hi a chhah ṭha tawk lo a ni. Chutichung chuan MPL khelh erawh kan la inbeisei ve reng a, football hi chu vanneih leh vanduai kar hi a hla vein kanhria. Reitlang hi huphurhna kan nei lo a, tlar hnung kan rem phui fuh theih chuan kan chak ka ring," tiin a sawi.