Arsenal aia ruh no Man United

Premier League season thar inbuatsaihna a kal chho mek a, champion tum ngam Arsenal chuan team indin thar mek Manchester United chu nimin zing khan 2-1 in an hneh. Friendly an nih avangin inkhelh zawh hian penalty shootout an nei leh a, Man United 4-3 in an chak.

SoFi Stadium, Los Angeles-a inkhelah Man United hian striker Rasmus Hojlund hmangin goal nei hmasa mah se, Gunners lamin Gabriel Jesus leh Gabriel Martinelli te hmangin an chhanglet.

Erik ten Hag tan buaina tur a awm, goal khungtu Hojlund leh pound maktaduai 52 man Leny Yoro te chu hliam vanga a thlak an ngai a, an dinhmun tak hriat theih a la nih loh avangin an ngaihchan a ngai dawn.

Man United manager Ten Hag chuan, "An dinhmun tak hre turin darkar 24 kan nghah a ngai, player an hliam hi chu a pawi ṭhin, nghawng hi a nei lo thei lo ṭhin a, na tak erawh an nih loh hram chu kan beisei," a ti.

Season hmasa khan Manchester United hi hliam vangin an lo buai viau tawh a, infiamna in a kel tel ni mah se team a nghawng miau avangin harsatna a thleng ṭhin. Jadon Sancho leh Antony te erawh harsatna nei loin an khel thei thung.

Ten Hag-a naute hian EPL inbuatsaih nan Real Betis leh Liverpool te an la hmachawn dawn, chumi hnuah FA Cup champion an nih avangin Premier League champion Manchester City nen FA Community Shield an khel leh dawn a ni.

Arsenal tan Emile Smith-Rowe a inlan lo chhunzawn, tun nipui bazar chhungin English player hian Fulham a zawm ngei dawn niin a lang ta a, hetih lai hian Italian defender Riccardo Calafiori chu tun kar tir lam hian contract an ziah felpui ang.

Euro khelh vangin Declan Rice leh Bukayo Saka ten training an la zawm ve lo a, England international pahnih hian London aṭangin team an zawm ang - Liverpool, Bayer Leverkusen leh Lyon te an la hmachhawn dawn a ni.

Copa America khel Martinelli leh Gabriel te bakah Germany tana Euro khelh bakah nupui nei hlim Kai Havertz ten ni khat lek training an zawm hnuah Man United an hmachhawn thei nghal.

Arteta chuan, "Kan player ṭhenkhat kha kan hnenah ni khat chauh an la rawn awm hman a, training pawh vawi khat chauh an chhim hman, chutiang chung chuan ṭha takin an khel thei, kan tan chuan inbuatsaihna ṭha tak a ni," a ti.