Mizoram hmachhawn tur Odisha

Junior Boys' National Football Championship for Dr B.C Roy Trophy 2024-25-ah vawiin tlai dar 3:00 hian Mizoramin an match hmasa berah Odisha an hmachhawn dawn. Narainpur, Chhatisgarh-a inelna neihah hian group khat aṭangin pakhat chauhin semifinal an luh dawn avangin Mizoram tan chuan 'final' tluka pawimawh a ni.

Odisha hian July 27, Inrinni khan RKM Ashrama Ground-ah Uttar Pradesh chu 3-1 in an hneh a, coach Sanjeev Patsani hote hian Mizoram hi an hneh thei a nih chuan semifinal an lut dawn.

Mizoram awmna group A-ah hian Odisha, Uttar Pradesh leh SAI awm tur an ni a, SAI an kal theih tak loh avangin team thum chauh an awm. Hei vang hian match hnih chauh khelh tur a awm a, vawiin tlaia inkhel hian semifinal lut turah nghawng lian tak a nei ang.

Mizoram leh Odisha te hi an inhnehtawk a nih chuan coach Lalrozama Fanai hote hian match tawp berah Uttar Pradesh chu goal hnih aia tama an hneh a ngai dawn a, nuam sa zawka semifinal thleng turin Odisha nena an inkhel result hi a pawimawh hle.

Dr B.C Roy Trophy hmachhawn tur hian Mizoram hi Sairanga MFA ground-ah kar hnih an camp. Rozama chuan, "Training kan nei ṭha a, kan training-na hmun leh kan inkhelhna tur hmun boruak pawh a inang viau. Inkhelhna tur hmun pawh artificial turf a ni a, kan tan chuan duhthusam a ni," tiin a sawi.

Rozama Fanai hian player ang pawhin sulhnu a nei ṭha a; Mohun Bagan leh Pune-ah te a inzir hnuah Pailan Arrows tan a khel a, Mohun Bagan, Bengaluru FC leh East Bengal bakah Aizawl FC tan a khel tawh. Inkhelh a chawlhsan hnuah Tata Trust Academy, Aizawl FC senior leh Kerala United Academy te a enkawl tawh a, sulhnu a nei ṭha hle.

Tun ṭumah hian Lalrozama hi head coach ni a; Lalchhanhima (assistant coach), Nelson Vanlalhriata (manager) leh Ramngaihzuala (physio) ten Mizoram team hi an kaihruai a ni.