BD-a hattrick hmangin AFC-in Police sawp
LZ Juice MPL11-ah Aizawl FC-in champion lai Mizoram Police chu Lalbiakdika hattrick hmangin 4-1 in an sawp a, I League club hian league winner nih tumin hmahruaitu Chanmari FC an hnaih zel. Police erawh match nga an khelhah chak aiin chak loh an ngah tawh zawk!
July 27, Inrinni chhunah football hmuhnawm bik chhawp chhuah a ni a, RG Stadium-a inkhelah Police-in F. Lallawmkima hmangin hma hruai mah se AFC-in Champhai Zotlang tlangval BD-a hattrick leh substitute Augustine Lalrochana goal hmangin an chhanglet. I League club-in head coach atana Victor Lalbiakmawia an dah ngheh hnua an match hmasa berah result duhawm bik an nei a, team boruak a ṭhat phah sawt ang.
Goal khat ve ve
MPL11 ṭan hma kha chuan Chanmari FC, Aizawl FC, Mizoram Police leh Chawnpui FC te hi ṭha fal deuh tura ngaih an ni a, inelna ṭan hnuah erawh a ni ta hauh lo. Rinlawk ang ngeiin Chanmari an ṭha a, Chawnpui erawh semifinal khel pha tur chuan a kaw tawpa an ṭan a ṭul dawn.
Chutihrualin Aizawl FC leh Mizoram Police te hriatthiam an har a, I League club-in hma an sawn chhoh zel laiin champion lai Police erawh Chawnpui ang thoin semifinal khel thei lo dinhmunah an ding.
Hei vang hian Police tan Aizawl FC hmachhawn hi an dinhmun hriat nan a pawimawh a, first half-ah an inkhel tawk hle. Minute rukna lekah R. Malsawmtluanga freekick chu Lawma'n a tauh lut a, Police-in bul an ṭan ṭha hle.
Team pahnih an fimkhur avangin goal chance a tam lo a, Aizawl FC-in minute 17-naah BD-a hmangin si phurh an sut a, goal luh dan erawhin sawi zui a hlawh. Laltlanzova'n Aizawl FC tan bul a ṭan a, Champhai Kanan tlangval Zozoa hian vei lamah la lutin 'replay' aṭanga a lan dan chuan ball-in line a pel hman a, mahse referee-in 'out' anga a hmuh si loh avangin Police an vanduai.
First half-ah chance a tam lo a, second half-ah erawh chance a tam ta thung. Police striker Talea'n chance ṭha pangngai a hlah hnuah chance ṭha bik a hlah. Dinglam aṭanga Lalbiakhlua cross chu Talea hian goal ruakah a khung lo.
Danglamna thlentu Samuel
Aizawl FC-in second half ṭantirhah Samuel Lalmuanpuia leh C. Zomuanpuia te an luhtir a, Victor-a'n substitution a siam ṭhat zar a zo. I League-a Mohammedan champion pui thei Samuel hian midfield-ah Aizawl FC a rawn tiṭha sawt a, an goal bawh a nat pha hle.
Samuel-a ke aṭangin ball ṭha a chhuak a, inkhel hmuhnawmna a belhchah. Goal hmaah Samuel-a a vanduai a, crossbar a pet per avangin Aizawl FC tana a match hmasa berah a khung lo.
Mahse, minute 77-naah Aizawl FC-in chiang takin Police tlarhnung an ṭhiat. Samuel leh Zomuana ten wall pass hmangin Police tlarhnung an paltlang a, Samuel hian BD-a pe lehin Champhai Zotlang tlangval hian kawh zetin hmahruaina goal a khung.
BD-a vul
Aizawl FC-in goal khung tlai deuh mah se hma an hruai hnuah goal venhim tum loin an nawr chhunzawm a, minute 82-naah BD-a'n angle zim tak aṭangin hattrick siamna goal a khung.
Tun season-ah BD-a hi match tinah a la che ṭha a, winger ṭha rual awm khawmnaah khawih chet thiang lo tia sawi thei a ni rih. Police lakah pawh hian BD-a hian chance ṭha hlah bawk mah se hattrick a siam a, tun season-ah goal nga a khung tawh bawk avangin MPL11-ah a vul hle.
Police lamin Malsawmfela hmangin si phurh sut ṭhenna remchang nei bawk mah se goal hmaah an vannei lo. Aizawl FC-in counter attack hmangin an chhu let a, Augustine-a'n injury time-ah chak nemnghehna goal a khung. MPL11-ah BD-a leh Augustine bakah Ramhlun Athletic forward Felix Lalruatsanga ten goal nga an khung tawh.
Police an lawm lo
Aizawl FC chakna tam mah se awlsam taka chak an ni lo a, Police lakah vanduai thei an ni. Inkhelh banah Police coach Lalbiaksanga Colney chuan, "Club tinte kan ṭang a, sum leh pai bakah tha leh zung pawh kan seng nasa. Hei vang hian referee-te hi ṭang ve rawh se. Kei hi referee sawisel vak vak chi ka ni lo.
"Mahse, an hna an tlin loh chuan club-in kan tawrh phah. Assistant referee-a awmte kha India rama hmeichhe inelna enkawl tur pawha tling an ni a, MPL-ah hian an ti ṭha duh lo nge, an chet danah kan lawm lo," tiin Vanglaini a hrilh.
Police coach BS-a hian Aizawl FC si phurh sutna chu a pawm thei lo a, referee thutlukna dik loh vanga a ngaih bakah inkhel tidanglamtuah a ngai. MPL champion lai hian an elpui Aizawl FC lakah point an hlawhchhuah loh avangin point ruk hmuin panganaah an awm mek a, semifinal khel lo thei dinhmunah an ding.