Sawmtea 'Chawnpui' an chak ta

LZ Juice MPL11-ah Chawnpui FC an tho chhuak a, Inrinni khan Bethlehem lakah goal chhuah hmasa mah se 2-1 in an lehthal. B. Malsawmzuala hoten MPL11-ah a vawi khat nan hnehna an chang.

RG Stadium-a inkhelah Danny Zorammawia hmangin FCB-in goal an khung hmasa a, second half-ah Chawnpuiin RM Zothansanga leh Lalramnunmawia te hmangin an chhanglet.

FCB an phur

FC Bethlehemin SYS FC chelhin point an hlawh chhuak a, Chawnpui hneh turin beiseina sang tak an neih phah. Rin lawk ang ngeiin FCB hian bul pawh an ṭan ṭha a, midfielder Varun-a'n Chawnpui keeper Buanga lakah penalty a hlawh chhuak nghal.

Lamzawl tlangval Danny-a'n penalty hi goal-ah a chantir a, MPL11-a goal thum a khungna chiah a ni. MPL9-a Chawnpui an champion ṭum khan Danny hi a tel a, midfielder anga chhawr a ni thung. Tunah erawh Danny hi forward-ah a inlet tawh a, thahrui a ngah bawk avangin tlarhmaah a chhawr tlak hle.

Bethlehem hian hmahruaina belhchhahna hun ṭha pawh an nei a, second half ṭan chiahah Kiran-a'n goal ruakah goal ban a tauh per a, goal se chuan result a danglam thei hial ang.

Chawnpui chu...

Chawnpui FC-in beisei angin season bul an ṭan ṭha lo a, MPL9-a an champion ṭum pawhin bul an ṭan ṭha lo, tih chu an inhnemna a ni.

FCB lakah goal chhuah hmasa mah se Chawnpui an beidawng lo a, goal mamawh zawk an nih avangin inkhelah pawh an chungnung zawk.

Chawnpui an vannei a, minute 51-naah RM Zothansanga'n mual vei lam aṭangin a vawrhlut a, goalkeeper Lhakpa dinna a dik tawk loh nen goal-ah a lut daih.

Sawmtea hote an phur chhunzawm a, minute 61-naah VL Thanga corner kick pet chu defender Lalramnunmawia'n a tauh goal. Chawnpuiin 2-1 in hma an hruai a, vawi leh khatah dinhmun ṭha zawkah an ding.

Hun tawp lamah Bethlehemin nawr let mah se an ṭang tlai hret a, chutihrualin siphurh erawh an sut teuh hle. Injury time-ah substitute Melvin-a ball pet chu Chawnpui keeper Buanga'n ṭha takin a dang.

Engtin zel?

Chawnpui hi table-ah pasarihnaah la awm mah se phase 1-a an la hmachhawn loh hi team thar Ramhlun Athletic FC leh Sihphir Venghlun FC te an ni. Coach Sawmtea hote hian beisei angin bul ṭan ṭha lo mah se I Day Football zarah insiamṭhatna hun an nei a, round 6 khelh hunah chuan team ṭha zawk an ni thei ang.

Chutihrualin team thar Ramhlun Athletic leh Sihphir Venghlun ten hma an sawn zel a, semifinal thlen beiseina an nei tawh. Chawnpui hi phase 1 khelh zawhah a sang palia awm thei an la nih rualin relegation zone-ah an la awm thei bawk.

FC Bethlehem erawh an elpui Chawnpui an hneh loh avangin chak hmel la hmu lo awmchhun an ni a, match nga chauh an la khel chungin semifinal sawi ri ngam chi an ni rih lo. FCB khelh hmabak hi Aizawl FC leh Police an ni a, phase 1-a point khat chauh hmu thei dinhmunah an ding.