Endrick an tlangzarh - Real an ṭha dawn!

Champions League leh La Liga champion Real Madrid-in chawlh hahdam an tum lo - khawvela footballer langsar pawl Kylian Mbappe an tlangzarh hnuah, rawlthar ṭhangduang ber pawl Endrick an tlangzarh leh ta.

European champion hian Santiago Bernabeu-ah kum 18 mi forward hi an tlangzarh a, Mbappe ang em chuan a boruak lian lo mah se, Real fans 40,000 zet khelmualah hian pungkhawmin, an player thar hi an lo lawm.

Endrick chuan, "Ka naupan tet aṭangin Real Madrid ṭantu ka ni ṭhin a, tunah chuan ka club ṭan em em tan ka khel dawn ta - a mak takzet a ni," a ti a, a thil tawn chu ropui a tih thu a sawi - a mittui a dang zo lo.

A hming Endrick

Real hian December 2022 khan Endrick la lut turin a club khelhna Palmeiras chu inremna an lo neihpui tawh a, mahse, kum 18 a la tlin loh avangin Brazilian forward hian dan angin Real a la zawm lawk thei lo - July 21-ah khan kum 18 hi a tling ve chiah.

Endrick-a man zat hi tarlan ni chiah lo mah se, euro maktaduai 60 bawr vel niin Spanish media-te chuan an tarlang a, ṭhenkhat chuan Real hian €35mtd an pe phawt a, a khelh ṭhat dan a zira €20mtd pek belh turin inremna an neihpui niin an sawi.

Palmeiras chuan Endrick an hralhna hi Brazilian football-a player man to ber record niin an sawi a, chhiahte nen phei chuan €72mtd a kai daih niin khawthlang media-te chuan an tarlang - Bernabeu-ah kum ruk cham turin contract a ziak.

Tu nge Endrick?

Kum 18 mi lek ni chungin Brazil tan match 10 a khel tling der tawh a, goal thum a khung. October 6 khan Palmeiras tana a match hmasa ber khelin, Brazilian Serie A club tan hian match 82 khela goal 21 khungin, assist vawi li a nei tawh.

South American Champions League tia sawi ṭhin Copa Libertadores thlengin Endrick hian tawnhriat a nei tawh a, a kum zat ngaihtuahin a tawnhriat hi a hraw hle - Brazilian Serie A nomawi vawi hnih ngawt a chawi tawh.

Serie A bakah hian Supercopa do Brasil nomawi a chawi tawh a, Sao Paulo state league Campeonato Paulista-ah vawi hnih a champion tawh bawk. Real-ah hian a kum nau ang ngawta en chi a ni dawn lo.

Duhaisam

Endrick chuan, "Ka lawmzia hi thua sawifiah chi a ni lo - Real Madrid tana ka khelh hi ka duhthusam a ni fo ṭhin a, ka tan chuan mumang ang mai a ni. Keimah mai ni lo, ka chhungte tan pawha ka beisei chu ka tihlawhtling ta," a ti a, Real pan chu duhthusam thleng dik a nih thu a sawi.

Lawm avanga mittui luang Endrick chuan, "Ṭah hi ka tum lawk bik miah lo! Ka sawi tawh ang khan naupan tet aṭanga he club ṭantu hi ka ni a, Cristiano Ronaldo ka hmuh khan he club hriatchian châkna hian min luah tlat a ni.

"Kha ta ṭang khan ka hawikir tawh lo. Ṭah hi ka duh bik lo a, mahse, ka thinlung aṭanga kha thil kha lo chhuak a ni - thawnthu ngaihnawm tak kan ziah ho theih ka beisei," a ti a, hma hun thui takin a thlir.

Bazar thiam

Real president Florentino Pérez-a'n a mit it zawng a hlah lo, tia sawi theih a ni a, a duh chu Santiago Bernabeu-ah a seng lut zel. Transfer bazar-ah lei ṭeuh kher ṭhin lo mah se, an lakluh erawh an hrawl ṭhin hle.

Paris Saint-Germain forward Kylian Mbappé chu free transfer-in an la tawh a, tunah Endrick an nei leh ta. Season hmasaa loan-a an hawh Joselu chu a nghetin la mah se, Qatar club Al Gharafa lamah an kaltir leh zui.

Midfielder ṭha mi Toni Kroos-a'n inkhelh a chawlhsan a, captain Nacho Fernandez chuan contract hmang zoin, Saudi Pro League club Al Qadsiah a zawm a, loan-a an hawh Kepa Arrizabalaga chu an hawtir leh tawh bawk.

An la leng

Real hian chhuak mai tawh tura ngaih, midfielder Luka Modric chu kum 38 tling tawh mah se, an la chelh a, tun nipuiah a contract hmang zo mah se, kum khat atan contract thar an ziahpui - Lucas Vazquez chuan kum khat dang a belhchhah ve leh bawk.

Los Blancos hi Alphonso Davies nen pawh sawizawm an ni a, mahse, Canadian left back pawh hian Real pan a hnial lo. Mahse, Davies hian nakkumah a contract a hmang zo mai dawn a, Real hi season thara a thlawna lakluh an duh zawk mai thei.

Liverpool right back Trent Alexander-Arnold pawh Real hian an beisei a, mahse, English defender erawh Anfield chhul chhuak a nih avangin a chhuah a rinawm lo zawk.

Real an ṭha

Madrid khaw club hian player lakluh belh tawh miah lo pawh ni se, an nomawi pahnih humhim turin an la ṭha tawk - tlarhmaah Vinícius Júnior leh Rodrygo an nei sa a, Mbappe leh Endrick ten an belhchhah avangin an ṭha sawt ang tih a chiang.

Jude Bellingham hian Euro duhthusam hmang lo mah se, season hmasaa an nomawi chawi theih nana player pawimawh a ni a; Federico Valverde, Eduardo Camavinga leh Turkish rawlthar ṭhangduang Aurélien Tchouaméni te chu midfield-ah an awm bawk.

Tlarhnung lamah Thibaut Courtois a dam chiang tawh a, a thachhang dawltu Andriy Lunin hi a rintlak viau bawk. Dani Carvajal, Eder Militao, David Alaba, Vázquez, Antonio Rüdiger leh Ferland Mendy te an la kawl cheu - Real an ṭha tawk.