UFC welterweight champion Belal Muhammad

Belal Muhammad chu UFC welterweight champion thar a ni ta - nimin zing khan American fighter ṭha hian champion lai Leon Edwards chu unanimous decision (48–47, 48–47, 49–46) in a hneh a, a vawi khat nan UFC champion kawnghren a hreng.

Champion kawnghren hum zo ta lo mah se Edwards-a'n a chak loh a pawm a, Manchester khawpuia fight neiha tlawm English fighter chuan, "Thil mak a ni lo e - round khatna aṭang khan ka chau nghal a, kar tluanin ka chau ngawih ngawih a ni ber.

"Belal ka lawmpui a, kan lo kir leh ang," a ti a, champion kawnghren chân hlen a tum lo - vawi 27 fight a neiha vawi li a tlawmna chiah a ni a, vawi 22 chakin, vawi khat chu 'no contest' a puan a ni.

Edwards hian August 2022 khan Kamaru Usman hnehin, a vawi khat nan UFC welterweight champion a ni - hemi hnu hian vawi hnih a belt hi a humhim a, a vawi thumnaah la champion ngai lo Belal ngam loin a chân.

Kum 36 mi Belal hian match 28 a khelh tawhah vawi 24 hnehna a chang a, vawi thum tlawmin, vawi khat chu no contest-a puan a ni - 'No Contest' a puan tak fight hi Leon Edwards nena an intawn hmasak a ni a, Edwards hian tihpalh thil thuin Belal-a mit hi a kutin a khawih fuh a, no contest-ah puan zui a ni.