Atletico defender thar Le Normand

Euro 2024-a Spain champion puitu Robin le Normand chuan club thar a nei dawn a, Atletico Madrid a zawm ang. Real Sociedad defender hian chawlh a la hmang mek a, a man tur zat leh a conrtract rei zawng tur hi puanzar a la awm hrih lo.

Kum 27 mi Le Normand hian French club Brest aṭanga a professional zinkawng zawh ṭanin, kum 2016 khan Real Sociedad hi a zawm. B team tan a season hmasa pahnih chu khel phawtin, 2018-19 season-ah khan La Liga a khel ve chauh a ni.

Sociedad chuan, "Vawiina a dinhmun a thlen theih nana chher liantu club tana a inpekna zawng zawng kha kan hre reng ang," tiin an player hi an thlah a, chawlh a hman zawhah engkim a chiang ang.

Spain tan vawi 17 inlana goal khat khungtu hian Sociedad tan match 221 khelin goal ruk a khungsak a, 2019-20 season khan Copa del Rey-ah a champion pui. France-a piang defender hian kum 2023 khan Spain khua leh tui nihna a nei ve chiah a, June thla khan Spain hian a vawi khat nan an ko nghal.

La Roja tan match 17 lek la khel chungin UEFA Nations League leh Euro nomawi a chawi der tawh.