Slot hoin Liverpool an chak

Liverpool chuan coach thar Arne Slot hnuaiah a vawi khat nan hnehna an chang a, Inrinni zing inkhelah Real Betis chu 1-0 in an hneh a, Dominik Szoboszlai chuan inkhela goal awmchhun hi a khung.

Reds hian tun thla laihawl vel khan Preston North End chu an club training ground-ah entu awm loin an lo hmachhawn tawh a, Championship club lakah hian 1-0 in an tlawm. US lamah tour nei zuiin, an match hmasa berah an chak.

Liverpool hian Jurgen Klopp-a hnuaiah'heavy metal football' tih an khel ṭhin a, an game a nungin a rang a, na takin an khingpuite an nawr ṭhin. Slot-a hnuaiah erawh an game a muang ta hret a, ball chan tam chu thupui berah an nei a, 4-2-4 formation hmangin, striker awm loin an khel.

Reds ṭantuten season tharah Klopp-a hnuaia gegenpressing kha an hmu dawn ta lo niin a lang a, Slot chuan striker a hman loh chhan erawh sawifiahin, "Season tak takah chuan striker nen kan khel ang. Tunah chuan Darwin Nunez-a'n squad a la zawm theih loh avangin striker kan la nei rih lo a ni," a ti.

Slot chuan sawi zawmin, "Number 10 pahnih hmangin, season thara an position tura awmin kan tichhin a, kan squad neih dan mil a ni tel bawk. Hnung lam aṭanga game siam chu kan duh dan ber a ni a, hetiang hmang hian counter-attack aṭanga goal chhuah tur kan veng thei ang.

"Season tharah tun ami ang hian khelh kan tum dawn a, hmasawnna tur erawh tam tak a awm. Kar hnih chauh kan la awm ho a, a ṭha thawkhat viau e," a ti - Reds hian hliam vangin Curtis Jones an chân a, he thu buatsaih a nih lai hian a dinhmun dik tak sawi theih a la ni lo.

Liverpool hian August 1 zing dar 5:00-ah Arsenal an hmachhawn leh ang a, August 4-ah Manchester United an hmachhawn zui ang.