Japan-ah Spurs an chak

Khawchhak rama pre-season tour nei mek Tottenham Hotspur chuan Vissel Kobe chu 3-2 in an hneh. Japanese club ṭha hian Yuya Osako hmangin goal hmahruai khung mah se, Spurs hian Pedro Porro leh Son Heung-Min hmangin an chhanglet a, 2-1 a ni.

Vissel Kobe tan Brazilian forward Jean Patric chuan khung ve lehin, 2-2 a ni a, mahse, minute 88-naah kum 16 mi Mikey Moore chuan Spurs tan chakna goal a khung a ni. London club hian pre-season match thum khel tawhin an la chak vek.

Scotland-ah 5-1 in Hearts an sawp tawh a, London-ah Queens Park Rangers chu 2-0 in an hneh zui. Inrinni tlaiah 3-2 in Vissel Kobe an hneh leh ta a, captain Son-a te ram pan zuiin, July 31, Nilaini tlai dar 4:30-ah K League XI nen an inkhel leh ang.