Chelsea chak che che; City chak chiang

Stamford Bridge-ah hun tawp dawna Willian-a goal hmangin Chelsea an chak che che a, Britannia Stadium-ah Manchester City chiang takin an chak thung.

Nilaini zan inkhel result-in Premier League table a sawi danglam lo a, field chhunga thil thlengin champion an la awm lo tih a nemnghet. Chelsea-in point 59 an hmu tawh a, anmahni hnaih bertu Manchester City aiin point sarih an sang zawk; season tawp hmain match 13 khelh tur a la awm.

Chelsea an danglam

Football-ah chuan hun tawp dawnah chakna goal a lut fo a, Stamford Bridge-a Chelsea chak dan erawh hun tawp dawna goal lut ringawt a ni lo - inkhel sawi zui hlawh tak a ni.

Chelsea-in keeper Thibaut Courtois aiah veteran Petr Cech an luh tir a, an ti fuh. Czech keeper hi Chelsea point thum hlawhchhuahna chhan a ni a, inkhelh ṭantirha Belgian forward Romelu Lukaku goal khung tur mak takin a dang.

Chelsea tan Juan Cuadrado-a'n a vawi khatna atan starting eleven a chang a, Colombian winger hian a chance neih hmasak ber chu goal zawnah a pet lo. Jose Mourinho-a'n an striker rinrawl Diego Costa hrem vanga an la chhawr theih loh avangin Loic Remy chu hman tawngah a dah a, French forward goal khung tur chu Everton keeper Tim Howard-a'n a dang ṭha hle.

Mualneitu tan Eden Hazard a hmuhnawm a, Belgian winger hian Cesar Azpilicueta cross a thun teuh hle. Chelsea-in ball chang tam mah se Everton tlar hnung a phui ṭha a, first half-ah goal a lut lo.

Everton boss Roberto Martinez-a'n yellow card hmuh tawh Muhamed Besic aiah James McCarthy chu second half ṭantirhah a luh tir a, inkhel thuntu erawh Chelsea tho an ni.

Hazard chu Everton tlar hnung tan a hnawksak chhunzawm a, a goal khung tur chu Bryan Oviedo-a'n ṭha takin a dan sak. Chelsea winger hian chance dang a nei leh a, keeper Howard-a'n a dan sak leh bawk. Everton keeper hian Matic-a freekick ṭha zetin a dang leh bawk.

Everton-in chance an nei meuh lo a, an neih chhun erawh goal theihna tur a ni. vei lam aṭanga Oviedo cross chu hnai tak aṭangin Lukaku-a'n goal zawnah pet mah se keeper Cech a kal pel lo.

Minute 20 la awmin Cuadrado leh Remy aiah Cesc Fabregas leh Didier Drogba te chu Mourinho-a'n a luh tir a; hemi hnu hian Chelsea tana Matic-a goal khung chu Branislav Ivanovic offside vanga pawm a ni lo.

Minute 88-naah Everton midfielder Gareth Barry chu Willian-a tlawh vangin hnawhchhuah a ni a, he buainaah hian Ivanovic chuan referee hmuh lai ngeiin James McCarthy chu rek bet mah se hrem a ni lo.

Hun tawpah Chelsea an vannei a, minute 89-naah Brazilian midfielder Willian-a'n Chelsea chakna goal a khung.

Martinez a thinrim

Everton manager Roberto Martinez chuan, "Referee thutlukna thlak danglam tumin Chelsea player-te kha an khawsa a ni. Barry-a'n yellow card vawi hnihna a hmuhna chhan kha Chelsea player-te sawisel nasat vang chauh a ni. Tin, Ivanovic-a chet dan kha a dik lo bawk. McCarthy kha a rek bet a, ka player khan engtinmah a khawih let lo a, red card a hmu tur a ni," tiin a lungawi loh thu a sawi.

Mourinho thukhawchang

Chelsea boss Jose Mourinho chuan, "Vawi hnih chiah ball a khawih a, first half-a a dan kha a ṭha a, second half ami kha a ṭha lehzual. Cech hi training-naah a che ṭha thei a, a inpeih hunah chiah kan hmuin ka hria," tiin a keeper a fak.

Mourinho chuan sawi chhunzawmin, "Referee thutlukna a ṭha a, referee khan ṭha takin inkhel a kaihruai a ni. Assistant referee-in kan goal khung a pawm loh pawh kha a dik a ni. Inkhel pawimawh tak a ni a, hetiang ang inkhel hmachhawn lo hi chuan champion nomawi ka chawi ngai lo," tiin a sawi.

Ivanovic chungchang erawh Mourinho hian a sawi chhunzawm duh lo a, 'Min ti nui suh u' tih pahin conference room a chhuahsan daih.

Champion tum City

Manchester City forward Sergio Aguero-a'n December 3 hnua a vawi khat nan goal a khung a, minute 33-naah City-in Stoke City lakah hma an hruai. Argentine forward goal hi minute li hnuah Peter Crouch hmangin Stoke-in an chhang let a, first half-ah 1-1 a ni.

Second half-ah champion tum Manchester City an danglam a, minute 55-naah James Milner-a'n hmahruaina goal a khung leh a; Aguero-a'n penalty aṭangin goal hnihna khung leh bakah Samir Nasri-a'n City goal lina a khung leh bawk. Hun a tawp meuh chuan City 4-1 in an chak.

Stoke City manager Mark Hughes chuan, "First half-ah khan beisei phak bakin kan khel ṭha a, second half-ah erawh player ṭha danglamna a lang a, kan tluk lo a ni," tiin a sawi.

Manchester City manager Manuel Pellegrini chuan, "Kan theihna angin kan khel chhuak leh ta. Second half-ah goal thum kan khung a, chance ṭhahnem tak kan nei bawk. Stoke khelmualah goal khung a harsa a, goal li lai kan khung thei hi a lawmawm a ni," tiin a sawi.