Coupe de France-ah PSG an chak
Nilaini zan khan Paris Saint Germain-in Nantes 2-0 in an hneh a, Coupe de France quarterfinal an lut. PSG hian match sarih chhung inelna hrang hrangah hneh loh an tawng tawh lo.
Parc des Princes-a inkhelah PSG tan Edison Cavani leh Yohan Cabaye te'n goal an khung a, Zlatan Ibrahimovic tel loin an chak. PSG manager Laurent Blanc-a'n players a siksawi nual a, Ibra hmuh tur a awm lo a, tlar hmaah Uruguayan Cavani a mal tlat.
Inkhelh ṭan aṭanga reiloteah Cavani a rawn lang nghal a, minute 18-naah PSG goal hmahruai a tauh lut. Nantes hian an siphurh sut ngei tum mah se PSG hi an ngam ngang lo. Minute 34-naah Nantes goalkeeper Maxime Dupe tihsual zarah Yohan Cabaye chuan a khung ve leh a, goal dang luh belh tawh loin chawlhlawk an hmang.
Chawlhlawk hman zawhah PSG bawkin inkhel an thunun a, Nantes defence a phui tawk lo a, a duh tawkin Cavani a che vel a ni ber. PSG tan an rawlthar Jean Bahebeck a che ṭha a, a chance neih ṭhatah goal khung lo mahse, a che vel a rangin a hmuhnawm a, goal erawh a khung lo.
PSG midfielder Blaise Matuidi chuan, "Tunhnaiah kan game-ah hmasawnna hmuh tur a awm a, team dang tana huphurh tham kan ni. Inelna chi hrang hrang paliah kan la dam kim vek a, hei hian kumina hma kan sawn zia a tilang," tiin a sawi.
Inkhel dangah AS Monaco chuan Rennes 3-1 in an hneh a, champion lai Guingamp-in division hniam zawka awm Yzeure hneh turin extra time an mamawh a, 3-1 in anchak hram.