Naktuk zinG aṬangin Cricket Wolrd Cup

Cricket World Cup chu Zirtawpni zing aṭanga khelh

ṭan a ni dawn ta. Naktuk zing dar 3:30-ah New Zealand leh Sri Lanka te'n game hmasa bera khel ang a, 9:30-ah Australia leh England te'n an khel lek bawk dawn a ni.

Sri Lanka vs New Zealand

Sri Lanka hi players upa leh naupang tak tak inchawhpawlh an ni a, champion tur khawpa squad nei ṭha an ni. An senior player pahnih khawvela bats­man ṭha pawl ni pha Kumar Sangakkara leh Mahela Jaya­wardena te'n an la tel pui.

Sri Lanka hian 1996 World Cup-ah an champion a, kum 2007 leh 2011-ah te final lut leh mah se an champion nawn tawh lo. Sri Lanka hi ODI ranking-ah 4 na an ni mek.

World Cup-ah la champion lo mah se New zealand hi a thlengtu an nih vang hrim hrim pawh hian kumin World Cup-a chance nei ṭha ber pawla ngaih an ni.

New Zealand hian Brendon McCullum leh Kane Williamson te an nei a, an batsman pahnih te hi an khelh ṭhat ni chuan bowler tana dan harsa khawpa run siam thei an ni. Bowling lamah Tim Southee-te ho turin veteran Dan Vettori te'n an la khelh theih dawn avangin an chhe lo ang.

Eng nge an sawi?

Sri Lanka veteran Mahela Jayawardena chuan, "Kum 2007 leh 2011-ah te final lut chungin kan champion zo lo ve ve. Final-a a zawna kan lut thei hi kan ṭhatzia tilangtu a ni a, kuminah chuan kan champion ngei tawh ka ring a ni," tiin a inringtawk hle.

New Zealand batsman Brendon McCullum chuan, "Tunhnaiah kan khel ṭha a, World Cup khel turin kan inpeih tawh," a ti. New Zealand hian kumin ODI match vawi riat an khelhah vawi ruk hnehna an chang thei a ni.

Australia vs England

Cricket World Cup a vawi li champion tawh leh champion ngun ber ni bawk Australia hian ODI ranking a pakhatna dinhmun luah chungin World Cup an khel dawn. Record nei ṭha Australia hi rinkai ber an ni.

Inhliam vanga hun rei tak chawl tawh captain Michael Clarke a lo kir leh tawh a, a kir lehna inkhel hmasa bera UAE an tum ṭumin run 64 a vawchhuak nghal. England an khelh hunah erawh a inlan a rinawm loh a, Steve Smith-a'n Australia a rawn ho a rinawm. Bowling lamah pawh Australia hi veteran Shane Watson te an la awm avangin England batsman ho tan zuam ngawt chi an ni hauh lo ang.

England hi World Cup a an thawm nat loh ber ṭum a ni hial maithei, World Cup hma lawka an warm up match-ah Pakistan an hneh loh avangin Australia meuh hneh tur chuan an insiamṭhat a ngai ang. An captain Eoin Morgan hi tunhnaiah a che fuh hleithei lo a, hei hi England lu tihai tu a tling khawp ang. Eng­land dinhmun hi batsman Gary Ballance khelh ṭhat leh ṭhat lohah an innghat thui viau ang.

Eng nge an sawi?

Australia batsman Steve Smith chuan, "Kan ram lei­lungah ngei kan inkhelh dawn avangin inkhelh vat vat kan chak tawh a ni. Zamna ai mah chuan kan phurna hi a nasa zawkin ka hria. Fans tam takin England kan tum hunah min ṭawiawm ngei ka beisei," tiin an phur tawh thu a sawi.

England coach Peter Moores chuan, "Players naupang leh ṭha tak tak kan squad-ah hian an awm a, players thawhpui nuam tak tak vek an ni. Tunah chuan team ṭha zawk kan indin tawh a, kan inpeih tawh a ni," a tiin Australia tum tura an inpeih tawh thu a sawi.