United an vannei leh ta

Manchester United-in Old Trafford-ah vannei takin Burnley 3-1 in an hneh a, inkhel danga West Ham-in goal awm loin Southampton an chelh bawk avangin United hi pathumnaah an kai chho.

Nilaini zanah Manchester United-in substitute Chris Smalling hmangin minute ruknaah goal hmahruai a, Burnley-in minute 12-naah Danny Ings hmangin an sut nghal. First half tawp hma hretin Smalling-a'n goal hnihna a khung a, substitute Robin Van Persie-a'n hun tawp dawnah penalty aṭangin a khung bawk.

Inhliamna leh vanneihna

Ṭan aṭanga minute ngana lekah Phil Jones chu inhliam vangin lakchhuah a ni a, a aia lut Smalling-a'n a luh aṭanga second 22-naah corner aṭanga ball kal Radamel Falcao-a tauh kawi chu a tauh goal. Premier League-ah substitute player goal khung rang ber dawttu a ni.

United bul ṭan ṭhatna hi a daih rei lo. Burnley-in inkhel an thunun a, midfielder Michael Kightly goal khung tur chu David de Gea-a'n a dang ṭha takzet a. Spanish keeper hian minute 12-naa Kieran Trippier-a cross Ings-a khung tur erawh a dang thei lo.

Inliam Daley Blind aiah Ander Herrera a lut a, Wayne Rooney chuan defensive midfield hna a thawk a. United tlar hmaa inkawp Van Persie leh Falcao aiin Burnley forward Ings-a langsar zawk.

First half-ah Burnley-in chance vawi 10 an nei a, United-in vawi thum chiah an nei thung.

Second half-ah United an insiamṭha hret a, chance nei hmasa zawk erawh Burnley an ni. Rooney tihsual zarah Ings-a chance neih chu keeper De Gea-a'n an a dan sak.

Minute 82-naah Scott Arfield lakah Angel di Maria-a'n penalty a hlawh a, tun season-a United penalty hmasa ber hi Van Persie-a'n goal-ah a chantir. United-in team game an khel thei lo a, result erawh an nei ṭha 3-1 in a chak.

Manchester United manager Louis van Gaal chuan, "Result ṭha tak a ni a, kan khelh dan erawh a lungawithlak loh. Burnley kha khel ṭha zawk an ni a, keini kha kan vannei zawk a ni. Daley Blind inhliam a ngaihtuah awm lo a, Phil Jones dinhmun erawh a ṭha lo, chanchin chiang zawk kan hre thuai ang," tiin a sawi.

Burnley manager Sean Dyche chuan, "Kan khelh dan chu a ṭha. Kan cheṭha chunga point thum kan hlawhchhuak lo kha, inzir ngai lai chu a ni. Danny Ings kha a khel ṭha a, team pumpui kha an khel ṭha a ni," tiin a sawi.

Saints an hriam lo

West Ham keeper Adrian chu minute 61-naah hnawhchhuah a ni a, chutichung chuan St Marys Stadium-ah Southampton-in goal an khung thei lo.

Saints forward Sadio Mane goal khung tur chu goalline aṭanga dan sak a ni a, defender Maya Yoshida-a'n hnai tak aṭangin a tauh goal lo bawk. West Ham subsitute Andy Carroll chu inhliam vangin a khel tluan thei lo a, hun tawp hnaiah mikhual team hian player pakuain an khel hial.

Southampton manager Ronald Koeman chuan, "Minute 30 chhung player 11 leh 10-a kan khel a nih chuan goal kan khung tur a ni a, mah se kan khung thei tlat lo. Awmze nei loin kan tlan nasa lutuk a, cross ball kan ngah lutuk avangin dan kan awl a ni. Box chhungah kan tlar hmate an la hriam lo a, inzir tur kan nei a ni," tiin a sawi.

West Ham manager Sam Allardyce chuan, "Kan keeper khan penalty area pawnah chuan a man ngei a, amaherawhchu khami hma khan keeper lakah khan an foul a ni. Kan player hnawhchhuah a nih takah kha chuan keini tan chuan point khat bak beisei tur a awm tawh lo," tiin a sawi.