MPL-ah Reitlang FC an kal zel dawn
Reitlang FC an tla lo, an him. Reitlang FC-in Mizoram Premier League Season 4 Playoff-ah Upper Republic an hneh a, season tharah MPL an khel zel dawn.
Nimin tlai Lammual inkhelah Reitlang FC-in Lalnunzira goal hmangin Upper Republic FC 1-0 in an hneh a, Reiek club hian Aizawl DFA hnuaia first division club hi aggregate-ah 6-5 in an hneh.
A danglam hret
Reitlang-in first leg-a bench-a an ṭhut tir Azira chu starting eleven-ah an dah a, MPL-a player pawimawh Lalzawmliana erawh bench-ah a ṭhu chhunzawm zel.
Upper Republic-in captain Lalremtluanga inhliam vangin la chhawr thei lo mah se tlar hnungah Siarhruaia an chhawr thei tawh a, midfield-ah Israel Ramhmachhuana an hmang thei tawh bawk. First leg ang bawkin tlar hmaah Lalruatpuia leh Ramdintluanga te an inkawp
Inkhel chu
First leg-ah 5-5 in inkhel a tawp a, second leg erawh a danglam. Team pahnihin goal khung aiin goal venhim an ngai pawimawh a, goal chance hmuh tur a awm meuh lo.
First half-ah goal a lut lo a, second half-ah Upper Republic FC-in chance an nei che ṭha zawk. ADFA Season Opening top scorer Ruatpuia'n Reitlang defence leh keeper a paltlang hnuah a pet goal lo.
Minute 72-naah goal kan hmu a, Reitlang tan Lalnunzira'n buai nuaih karah a khung a, hei hi Reitlang chakna goal a ni a, 1-1 in inkhel a tawp.
Reitlang thukhawchang
Reitlang coach lailawk Johny Lalawmpuia chuan, "Lawmna tur hlir a ni mai. Player-te, club hotute leh min ṭawngṭai saktu zawng zawng chungah lawmthu kan sawi a ni. Ka player-te an khel ṭha tlang vek a, a mimal taka han fak tur bik an awmin ka hre lo. MPL kan khel leh tur hi kan lawm a ni," tiin a sawi.
Johny chuan sawi chhunzawmin, "Upper Republic hi team ṭha tak an niin ka hria. MPL club zawk ni mah ila hlauhthawnna nen kan khel a, kan chak hram a ni. Upper Republic hi beidawng loin kal zel rawh se, tun aia sang zawk thleng thei an ni," tiin an khingpuite a fak.
Reitlang FC secretary Zonunsanga Pachuau chuan, "Playoff bika kan club enkawltu Ma-Johny ka fak khawp mai. Tihtak takna nen Reitlang a enkawl a, field chhungah a thawhrimna rah kan tel ta a ni. A chungah kan lawm hle a ni," tiin Reitlang Under 17 coach Johny hnathawh a nih thu a sawi.
Zonuna chuan sawi chhunzawmin, "Reitlang tun dinhmun kan thlen theihna chhan hi President (Lalṭanpuia Rivung) leh head coach (Lalrinsanga) te an ni a. Tin, player-te hnathawh kan hmuh hmaih lo a, an chungah lawm takzet a ni. Season tluana Pathian min kaihruainaah kan lawm a, MPL4-ah tun aia team ṭha zawk din kan tum ang," tiin a sawi.