Mizoram Super League a hnai tual tual

Mizoram basketball hmel thlak danglam tur, Mizoram Super League match hmasa ber chu February 19 zanah Hawla Indoor Stadium-ah khelh ṭan a ni dawn.

MSL Handbook

Mizoram Super Lea­gue kaihhruaina MSL Handbook chu Mizoram State Sports Coun­cil conference hall-ah February 10, 2015 khan MBBA presi­dent Chal­rosanga'n a tlangzarh.

MSL Board Chairman Dr Lalrinawma Hnamte kaihruainna hnuaiah club aiawh, MBBA technical committee leh MSL Board te'n MSL tana hriat tur pawimawh leh kalphung turte sawifel an sawi fel a; MSL First Round fixture tie-draw neih nghal a ni.

Fixture-a hming lang hmasa zawkte hi Home Team zel an ni dawn a, a hnuhnung zawk hi Away Team an ni ang. Ticket hralhna aṭangin Home Team-in 40% an chang ang a, Away Team-in 30% an chang ang. 30% dang chu MSL Board-ah dah a ni thung ang.

Halftime Show

Halftime lai hian Dance Battle a awm ang a, Home leh Away Crew-te an inlamsiak thin ang. A chak zawk leh chak lo zawk tan lawmman a awm thin ang.

Fan-te Hriattur

Hawla Indoor Stadium gate chhungah mipuite tan 'parking' a awm thei dawn lo a, traffic lama harsatna awm lohna turin MSL Board chuan mipuite motor keng tlem thei ang zawnga kal thiam turin a ngen.

Gate-ah ticket lei tur a awm ang a, ticket man hi Rs 30/- (Courtside Ticket) leh Rs 100/- a ni ang. Security chungchanga a him zawk nan gate chhunga lut tawh tan chhuah phal a ni tawh dawn lo a, an chhuak a nih pawhin Ticket a thara an lei zel a ngai ang.

Ei leh In duh tan Gate chhungah a zawrhna hmun siam a ni ang.