Barca-in final an hnaih

Nilaini zan khan Copa del Rey semifinal first leg-ah Barcelona-in Villarreal 3-1 in an hneh a, final lut turin an dinhmun a ṭha hle. Inkhel dangah Athletic Bilbao leh Espanyol te 1-1 in an inhnehtawk. Semifinal second leg hi March 4, Nilainia khelh leh tur a ni.

Nou Camp-ah chuan...

Barcelona-in Lionel Messi, Neymar leh Luis Suarez te starting eleven-ah dahnghal mah se goal erawh an khung mai bik lo. Minute 41-naah Argentine forward Messi-a'n Barcelona hmahruaina goal a khung chauh. Mualneitu fans au thawm pawh a reh hmain Villarreal midfielder Manu Trigueros chuan an siphurh a sut a, 1-1 in first half a tawp.

Second half-ah Barca lamin goal khung tumin an nawr chhunzawm nghal a, ṭan aṭanga minute lina lekah Andre Iniesta hmangin goal hnihna an khung a. Spain defender Gerard Pique-a'n minute 64-naah goal thumna a khung leh bawk.

Goal thum luh hnuah Villarreal an khel ṭha a, goal erawh an sualchhuak thei lo. Villarreal defender Mateo Musacchio handball vangin Barca-in penalty an hlawh chhuak a, Brazilian forward Neymar-a pet chu Villarreal goalkeeper Sergio Asenjo-a'n a lo dan sak a, 3-1 in inkhel a tawp.

Barca tlarhma

Barca thiampuipa Messi hian tun season-a inelna hrang hrangah Barca tan goal 34 a khung leh der tawh a, assists vawi 17 zet a nei tawh bawk.

Brazil captain Neymar hian tun season-ah Barca tan La Liga-ah goal 16 a khung tawh bawk.

Liverpool goal thun khawl ni ṭhin Suarez hian a club thar tan hian goal khung tam rih lo mah se a khel chhe hran lo a, Villarreal nen an inkhelh ṭum pawh hian a ṭhiante goal khung tur ṭum hnih a siam sak a ni.

Engnge an sawi?

Barca boss Luis Enrique chuan, "Kan khel ṭha takzet a, Villarreal khan an goal an ven uluk em avangin goal thun tam a harsa hle. Mahse kan duh ber chak result erawh kan hlawhchhuak tho e. Pique khan a khel ṭha takzet. Ani hi kan player pawimawh berte zing ami a ni," tiin a sawi.

Enrique chuan penalty chungchang sawi chhunzawmin, "Penalty pet tur kha kan ruat lawk vek a Messi-a pet tur a ni. Mahse Neymar khan pet a dil a nih ka ring, ani kha chu Messi a dawta pettu tur a ni," tiin a sawi.

Villarreal coach Marcelino Garcia chuan, "Tun hnaiah khel ṭha mah ilaBarca tlar hma dan chu a har a ni. Barcelona-te nena inkhaikhin chu thil theih a ni rih lo ang, an hmatawngte man zat ringawt pawh hi kan club budget let sarih vel lai a ni. Tunah hian inkhelh hmabak kan la nei a, kan theihtawp kan la chhuah dawn a ni," tiin a sawi.

Khelmual dangah

San Mames-ah mualneitu Athetic Bilbao-in goal an khung hmasa zawk a, Spanish forward Aritz Aduriz chuan Oscar de Marcos hnen aṭanga ball hmuh chu minute 11-naah goal-ah a chantir nghal.

Espanyol-in first half-ah vek an siphurh an sut a, Bilbao defender-te chetbuai nangchingin Victor Sanchez Mata-a'n minute 35-naah an siphurh a sut. Second half-ah goal dang luh lut loin 1-1 in inkhel a tawp.