New Delhi-ah AIFF League Committee nei

Nimin khan AIFF Football House, New Delhi-ah AIFF League Committee neih a ni a, Mizoram Football Association honorary secretary Lalnghinglova Hmar (Tetea Hmar) a tel.

AIFF League Committee-ah hian Tetea Hmar hi Deputy Chairman a ni a, nimin meeting hi AIFF senior vice president leh league committee chariman Subrata Dutta kaihhruainaa neih a ni.

Season tharah Hero I-League club tel thar dun tan a chhan theih dawn a, chutiang bawkin Hero 2nd Division League-ah pawh kalpui a ni ang. 2nd Division aṭangin team pahnih I League-a tlintir chungchang pawh ngaihtuah a ni a, season tawpah thutlukna siam a ni chauh ang.

League Committee hian State League (MPL etc), Hero I-League, Hero ISL, Durand Cup, Hero Super Cup leh IFA Shield chungchang zirchian a, an mamawh dan mila football calendar siam a, transfer window hawn tum a ni.

Hero I League-ah player 35 inziahluh theih chu 30-ah tihhniam a ni tawh dawn a, Under 22 player a tlem berah panga neih a ngai dawn. Season thar aṭang chuan India rama inbengbel foreigner-te ziahluh dan siam a ni dawn a, Hero Junior leh Sub Junior League-ah te pawh hman a ni ang.

League Committee hian Hero Indian Women's League, Khelo India Girls Football League (U17) leh Golden Baby Leagues chungchang pawh an zirho a, women's league siamṭhat dan tur an rel bawk.