Belgium tan Nainggolan goal ropui a tawk

Champion rinkai zinga mi Belgium-in Euro 2016-a an match hmasa berah Italy hneh lo mah se an match hnuhnung pahnihah hnehna chang ve vein champion thei an ni tih an pholang nawn a, Nilaini zan khan Sweden chu Radja Nainggolan goal ropui hmanga 1-0 a hnehin last 16 an lut.

Republic of Ireland-in Italy lakah an huaisenna an hlawh-tlinpui a, hun tawp dawna Robbie Brady goal hmanga Azzurri hnehin last-16 an lut ve ta. Britain awp ram zingah Scotland chiahin Euro 2016 an khel lo a, Northern Ireland, Wales, England leh Ireland-te last 16-ah an inlan vek dawn.

Belgium thar?

Inkhel ṭan a nih hmain team pahnih hi last 16 lut ve ve thei dinhmunah an ding a, Belgium tan point khat a tawk laiin Sweden tan chak ngei ngei a ngai thung. Ireland laka 3-0 a chak hlim Belgium chu goal hmaah an hriam tawk lo a, hun tawp nan minute ruk chiah a awm tawh tihin he inkhela goal awmchhuan hi an khung hram - an goal khung erawh a class a sang a, yard 25-a hla aṭanga goal khungtu Roma midfielder Nainggolan che velin amah rimtu Chelsea fan-te chil a ti put hlein a rinawm.

Marc Wilmots-a naute tana player langsar ber erawh Kevin de Bruyne a ni. Mahse, Manchester City winger hian Thomas Meunier tana a ball cross ṭha tak chu Club Brugge defender hian goal-ah a chantir thei lo a, Romelu Lukaku tana ball ṭha tak a siamsak chu Everton striker hian keeper chauh a hmachhawn hnuah goal-ah a chantir thei lo bawk.

Sweden-in chak ngei ngei an mamawh tih hriain an match hmasa pahnih aiin an khel ṭha zawk a, Belgium goal zawnah vawi li lai shot an nei - Belgium an hmachhawn hian match hnihah target zawnah vawi khat chiah an pet! Sweden vanduai erawh a kaltluang emaw tih mai tur a ni a, goal an chhuah hmaa Andreas Granqvist-a ball tauh line aṭanga De Bruyne-a'n a lo pet chhuah hman kha an ui vawng vawng ang.

Thukhawchang

Belgium coach Marc Wil-mots chuan, "Sweden khan goal khung an mamawh avangin goal venhim lam kha kan ngaihpawimawh hmasak a ṭul a ni. Counter attack hmangin kan bei a, keeper ṭha tak an neih avangin kan khung lawk thei lo. Kan group awmna aṭanga last 16 luh hi thil awlsam a ni lo a, match thum aṭangin point ruk kan hmu a, kan khel ṭha a ni," tiin a naute khelh dana a lawm thu a sawi.

Sweden coach Erik Hamren chuan, "Zlatan-a tan hei aia tawpna duhawm zawk kan duh a, mah se kan ti thei lo. Kan result avangin ka lawm lo a, mah se ka player-te inpeknaah fak an phu a, a tawp thlengin theihtawp kan chhuah a ni," tiin chak lo mah se a naute inpeknaah a lawm thu a sawi.

Ireland an lawm

Nilaini zan group E inkhel dangah last 16 lut tura chak mamawh chu Ireland an ni a, an hmachhawn Italy erawh last 16 lut chiang tawh niin Spain hmachhawn tur an ni. Italy coach Antonio Conte-a'n Spain an tum tur ngaihtuah ran chungin a player ṭha rual a awltir a, hetichung hian Ireland tan chuan hneh huphurhawm tak an ni.

Mahse, Ireland-in khelmual chhungah hnehna chang duh zia an lantir a, Italy goal-ah an nawr na hle. Group stage match hnuhnung ber an khelh hma zawnga target zawna shot vawi khat chiah nei team hian Italy goal zawnah vawi li an pet a, a vaiin goal shot 12 an nei - Italy in goal khung tumin vawi nga chiah an pet thung.

Hun tawp nan minute nga chiah a awm tawh tihin Ireland-in an thawhrim rah an hmu ta nge nge - Norwich City winger Robbie Brady chuan Italy goal lamah a tauh lut a, khelmual chhunga player mai ni lo bench-a Ireland staff leh player-te an tlankhawm a, fan-te an lam mup mup! Hun a tawp a, last 16 lut turin Ireland chu 1-0 in an chak.

Zan danglam

Republic of Ireland manager Martin O'Neill chuan, "Inkhel kan thunun avangin chak kan phu a, zan danglam bik a ni. Kan group awmna ngaihtuahin last 16 kan lut thei hi a ropui takzet a ni," a ti.

Goal khungtu Robbie Brady chuan, "Zanin hun ang hi ka lo suangtawh tawh ṭhin a, ka chhungte hmuh lai ngeia ka suangtuah ṭhin a hlawhtling hi sawi ngaihna pawh ka hre lo a ni. Ka a mup a ni ber a, kan vaiin kan khel ṭha em em vek a ni," tiin a hlim hle.