Sweden kawr hain Ibra kan hmu tawh dawn lo

Zlatan Ibrahimovic-a'n Bel-gium nen an inhmachhawn hmaa thuthar thehdarhtute a kawmnaah Euro 2016 zawh ruala ram tana inkhelh chawlhsan a tum thu a sawi a, Belgium chu a tawpna ni lo hram se a duh thu a sawi - mah se Belgium lakah Sweden an tlawm a, Sweden kawr hain striker ropui hi kan hmu dawn ta lo.

Kum 34-a upa striker chuan, "A hrehawm a, pawmthiam a har a, chutih rual chuan Sweden kawr ha chunga Euro kan khelh avangin nuam ka ti em em a, kan ram team-ah hian hriat reng tur thil tam tak ka tawng a ni," tiin Sweden a mangṭha.

Sweden coach Erik Hamren chuan, "Ram tenau tak kan ni a, Sweden ang ramah chuan Zlatan anga player ropui dang hmuh tur an awm lo - player danglam leh chungchuang bik a ni," tiin a striker chu a mangṭha.

Bosnia-Herzegovina, Swe-den leh Croatia tana khel thei vek chunga Sweden thlangtu striker hi Swedish mipui tan a hlu a, an ram tana match 116 inlan chunga goal 62 khungtu striker hi Sweden mipuite thinlungah a cham reng tawh ang.

Ram tan kum 15

January 31, 2001 khan Faroe Islands leh Sweden ten friendly match an khel a, player tawnhriat ngah tawh tak tak karah rawlthar kum 19 mi a awm - a hming chu Zlatan Ibrahimovic a ni. Khatih hunlaia a ṭhiante khan Swedish striker piang tawh zinga ropui ber turin Sweden tana a match hmasa ber a khel tih an hre lawk bik kher lo ang - hre lawk nise chuan an inchhuan phah mahna.

Kum khat hnuah Ibra-a'n World Cup 2002 qualifier-ah Azerbaijan hmachhawnin ram tana a competitive match hmasa ber a khel a, goal a khung nghal bawk. Khawvel hmelhriat tura Ibra inpholan tak takna erawh Euro 2004-ah khan a ni - Italy nen group stage-a an inhmachhawn
ṭumin mawi takin a kheng goal a, Euro goal ropui an sawi apiangin sawi hmaih a ni ngai lo.

Ram tan Zlatan a ropui reng bik lo. 2006-07 chhungin ram tan match 13 a inlanah goal a khung miah lo a, sawisel a tawk nasa hman hle. Euro 2012 qualifying khelh a nih dawnin Sweden captain atan Ibra ruat a ni a, a hawikir tawh lo.

Euro-ah an ram chu hruai thlengin group stage erawh a paltlang pui zo lo a, group stage match-a France 2-0 a an hneh
ṭuma a volley ropui chu striker naran tih theih a nih loh avangin tun thlengin sawi a hlawh - Ibra hian 2012 ah hian ram tan match riat khelin goal 11 a khung.

Kum 2013-ah pawh Ibra-a'n ram tan a thiamna a hmang chhunzawm zel. Swedish foot-ball chanchina reh tawh ngai lo turin England chu friendly match-ah 4-2 in an hneh a, goal li hi Ibra khung vek a ni - chu mai a la ni lo cheu, a goal lina hi yard 35 vela hla aṭanga overhead kick hmanga lut niin goal ropui a ni a, khawvel media ten Ibra thiamna leh ropuina an infak siak.

Ibra thiamna ringawtin Sweden a hruai reng thei lo - kum 2014 World Cup khel turin an inpet tling zo lo a, Euro 2016 an khelh theihna turin qualifying round-ah goal 11 tehmeuh khung mah se group stage paltlang zo loin an tla leh ta.

Sweden-in Ibrahimovic an neih hma zawnga ram tana goal khung hnem ber chu Sven Rydell a ni. Kum 1932-a ram tana inkhelh chawlhsantu striker hian vawi 43 inlanah goal 49 a khung a, a record hi a ding rei hle. Kum 2014 khan Ibra hian Rydell-a record hi khumin ram tana a goal 50-na Estonia lakah a khung a, Sweden hian goal 62 zet khungtu Zlatan-a record khumtu an hmu lawk lo a nih pawhin a mak lo ang.

Zlatan a ṭawngkam

Manchester United nena sawi zawm mek striker hi a football thiamna piahlama a ṭawngkam maksak leh khawsazia vangin ngaihven a hlawh a, club football piah lamah an ram tana a khelhna lamah ṭawngkam maksak tak tak a lo hmang tawh.

Season hman zawh taka Paris Saint-Germain tana goal 50 khungtu striker hi thlahpawlh a nih avangin a thiamna pawh chutiang taka inchawhpawlh chu a ni em tia an zawh ṭumin, "Swedish style emaw Yugoslavia style emawin ka khel lo, ka khelh dan hi Zlatan-style a ni," tiin amaha style hranpa a neih thu a sawi.

Kum 2002 khan Norway leh Sweden an inhmachhawn dawn a, Norway striker John Carew chuan Ibra a ball khawihvel dan chu awmze nei lo a nih thu a sawi - Zlatan a ngawi mai mai lo. Sweden a chhauhsan hnua a club khelhna apianga league nomawi la chawi ziah striker chuan, "Carew-a'n football hmanga a tih theih hi chu kei chuan serthlum nen pawh ka ti thei ang," a ti!

Euro 2004 qualifier-a Latvia nen an inkhelh zawh hnu lawkah Ibra hi night club-ah hmuh a ni a, sawisel a tawk nasa hle. UEFA Team of the Year-a vawi li lang thei striker hian ngaihdam a dil a, "Ngaihdam ka dil a, ka dil chhan erawh dik lo taka ka khawsak vang ni loin ka night club kalna thlan fuh loh vang a ni," tiin a ngaihdam dil dan erawh a dang deuh.

November 2012-ah England lakah goal ropui a khung a, Zlatan chuan, "Khatiang goal ropui kha chu in zirtir chi a ni lo," tiin a goal khung chu a thiam bik vang liau liau a nih thu a sawi!

2014 World Cup playoff-ah Sweden-in Portugal an hneh lo a, Zlatan chuan, "Ka tel lohna World Cup hian hlutna a nei lo a, han nghahhlelh vak chhan tur a awm tawh lo," tiin a tel lohna World Cup chu hmuhnawm tawk lo turah a ngai.

Euro 2016 playoff-a Denmark leh Sweden an inhmachhawn dawn ṭumin Denmark media ṭhenkhatin ram tana inkhelh chawlhsan hnaia an sawi Ibra chu international football aṭanga an chawlhtir tur thu an sawi a, a tawpa chungnung zawk erawh Sweden niin Ibra-a'n goal hnih a khung.

Zlatan-a'n amah tih eltute a hun takah a chhangin, "Denmark hoin min chawlhtir tur thu an sawi a, an ram pumpui chu chawlh ka pe ta zawk a ni," tiin inkhelh zawhah a sawi.