Mary Kom-i'n chawlh a la thum lo

Olympic-ah inlan thei dawn lo mah se MC Mary Kom chuan tun dinhmunah inhnek chawlh san mai a la tum loh thu Ningani khan a sawi chhuak.

Kum 33-a upa Mary Kom hian 2012 London Olympic-ah khan India tan bronze medal a la a, August thla a neih tur Rio Olympic-ah hian India tana inlan thei ngei tura beisei ni mah se March thla a neih Asian Zone Qua-lifier bakah thla hmasa lawka neih zawk tak World Championship-ah te a chet ṭhat tawk loh avangin Brazil hi a pan thei ve dawn lo.

World champion vawi nga lo ni tawh Kom chuan, "Olympic-a ka inlan thei lo tur hi ka tan chuan a na hle a, sawi thiam pawh a har. Mahse, ka beidawng tihna erawh a ni lo a, ka taksa a fit ṭhat chhung chu ka inhnek chhunzawm zel ang," tiin a sawi.

Manipuri boxer chuan sawi chhunzawmin, "Ka kum leh hun tawn ngaih-tuahin mi tam tak chuan chawlh ka tum an ring a, naupangte zirtirna nasa zawka ka pek theih nan hun ka insiam sak pawh an ring. Amaherawhchu, tun dinhmunah chuan khatiang lam khan a rilru a la luah lian lo zawk," tiin ring chhung chhuahsan a la tum lem loh thu a sawi.