Euro 2016 Last 16-a inhmachhawn tur a hriat kim ta
Austria-in European Cham-pionship last 16 lut turin chak an mamawh a, Stade de France-a inkhel hmuhnawm takah Iceland-in substitute Arnor Ingvi Traustason goal hmangin Austrian mipui an vel. Group F inkhel hmuhnawm takah Iceland-in Austria chu 2-1 in an hneh a, quarterfinal-ah England an hmachhawn ang.
Thawnthu ngaihnawm
Mipui nuai thum chuang awr chenna Iceland-in Euro 2016 bul ṭan nan Portugal an inhnehtawkpui a, Hungary lakah point khat hlu tak an sual chhuak bawk. France rama an thawnthu ziah ngaihnawmna belhchhah tur hian group match hnuhnung berah tun hmaa an la hneh ngai loh Austria an hmachhawn bawk.
Iceland-in bul an ṭan ṭhaa a, Johann Gudmundsson-a'n woodwork tih per nghalin Jon Dadi Bodvarsson-a'n minute 18-naah goal hmahruai a khung. Bayern Munich defender David Alaba hlawhchhuah penalty hman ṭangkai a ni lo a, last 16 lut tura chak mamawh Austria tan Aleksandar Dragovic pen chhuakin goal ban a pet per.
Second half-ah team pahnihin penalty shout vawi khat ve ve an nei leh a, referee-in player-te ngaihdan a ṭawmpui lo ve ve. Minute 60-naah substitute Alessandro Schopf-a'n an siphurh a sut a, last 16 lut turin Austria-in goal khat dang an mamawh.
1-1 hian inkhel tawp se chuan Iceland hi pathumna an ni ang a, an khingpui tur chu Croatia a ni. Khawvel erawhin he result avanga Portugal leh England inkhel thei tur an lo ngaihven thung a, chak zawk awm loin inkhel tawp chiah se chuan 2006 World Cup quarterfinal-a Cristiano Ronaldo chet dan vanga Wayne Rooney red card hmuh te chu nasa taka sawi zui tur a ni.
Chak mamawh Austria-in tlak duh loin an nawr a, Iceland defender Kari Arnason a khel ṭha takzet. Injury time-ah erawh goal mamawh Austria an chesual a, counter attack hmangin Iceland-in an vaw let a, substitute Traustason-a goal chu Austria beiseina titawptu a ni.
SK Rapid Wien midfielder Traustason goal hian Iceland chu Group F bikah pahnihnaah a vawrh chho a, Portugal-in England pumpelhin Croatia an hmachhawn phah bawk.
Coach thukhawchang
Austria coach Marcel Koller chuan, "Penalty pettu pahnih kan nei a, David Alaba leh Aleksandar Dragovic te an ni a, khelmual chhungah thutlukna an siam a, mawhphurna latu zawk chu Drago a ni. Penalty a pet goal loh vang khan kan dem lo. Tun ṭumah hian kan khelh dan phung ṭhat loh vanga tla nghal kan ni lo a, hlauhthawnna kan ngah vangah ka ngai zawk" tiin tawnhriat an la nei tam lo chu an chak loh chhanah a ngai.
Iceland coach Heimir Hallgrímsson chuan, "Inkhel entu zawng zawngin kan tana chak hlut zia an hriat vek ka ring. Chak tumin kan theihna zawng zawng kan chhuah a ni. Chutihrualin Austria lam an vanduai a, goal khung tumin a tawp thlengin min nawr a, kan vannei tel bawk," tiin chapo thei an nih lo tih a hrechiang hle.
Eng nge a nghawng?
Group F-a Iceland an chak avang leh Portugal-in point an hlawhchhuah avangin Group A pathumna Albania an tla. Zan reia inkhelah Republic of Ireland-in Italy an hneh a, Group D pathumna Turkey an tla bawk.
Last 16 fixture-in sawi zui a hlawh a, champion lai Spain final kalkawng tur chu a ngaihnawm lai chu a ni. Spain hian Italy an hmachhawn dawn a, an chak a nih chuan quarterfinal-ah Germany leh Slovakia inkhela chak zawk an hmachhawn ang. Hei chauh hi a ni lo, Spain awmna lamah hian France leh England an awm bawk.
Germany hi 2014 World Cup champion an ni a, Spain hi 2010 World Cup champion niin Spain hi 2006 World Cup champion an ni. Semifinal-a an hmachhawn theih tur France hi ienlna thlengtu an nih bakah 1998 World Cup champion an ni bawk. England erawh World Cup an champion chhun pawh 1966 World Cup ni daih mah se league an neih ṭhat bakah an invawrh lar thiam avangin khawvelin an ngaihven.
Last 16-ah British Derby a awm dawn a, Wales emaw Northern Ireland emawin quarterfinal an lut dawn. Euro 2016-a mipui barakhaihtu Hungary leh Belgium inkhel turin ngaihven a hlawh dawn a, Croatia leh Portugal a hmuhnawm ang. Ram hming langsar vut ni si loah chuan Switzerland leh Poland inkhel tur hi hriatthiam a harsa a, ram pahnih hian tawnhriat ngah zawk ram hneh turin player an nei ṭha tawk.