A ropuina ramah Federer inlan dawn

Football sawi chuan Lionel Messi hming a langsar a, basketball sawi chuan LeBron James a ni thung. Tennis chanchin sawi erawh chuan Roger Federer lam rik loh a harsa a, Wimbledon sawi ngat phei chuan Swiss pachal hi sawi hmaih theih a ni lo.

27 June - 10 July chhung hian Grand Slam pali zinga grass court-a an khelh awmchhun Wimbledon chu khelh a ni leh dawn a, vawi sarih champion tawh Federer chu seeded pathumna a ni ang.

Kum 34-a upa Federer hi a kum a tam ve tawh deuh bakah hliam a neih ve tak fo avangin tun hnaiah beisei angin a khel chhuak tawh meuh lo. A zawna major tournament vawi 65 a khelh hnuah kumin French Open kha hliam vangin a khel thei lo a, a dam hnuah pawh tournament pahnih khel leh tawhin a la hlawhtling chiah lo.

Wimbledon Championship hi kum 1877 aṭanga khelh ṭan niin a awlsam zawngin Wimbledon tia sawi mai ṭhin a ni. Khawvela tennis tournament upa ber niin Grand Slam tournament zingah Australian Open leh French Open (Roland Garros) zawha khelh niin US Open-in a zui leh ṭhin.

Best of five set hmanga chak zawk zawn ṭhin a nih avangin thiam bakah thahrui ngah a ngai a, kum tan deuh tawh tan hlawhtlin a harsa. Kum 1975 khan Arthur Ashe (32) a champion a, ani hi champion thei upa ber a ni.

Grand Slam vawi 17 champion tawh Federer chuan, "Tuna ka mamawh chu insiam ṭhat a ni a, a bik takin baseline aṭanga ka ball vual a ṭha tawk loin point pawimawh bik hmuh dawnah ka chesual fo bawk. Ka service pawhin tun hma a la phak lo a, ṭha taka khel thei turin ka inpuahchah ngawrh hle," tiin a sawi.

World number 1 Navak Djokovic khelh ṭhat tluan lai a ni a, Serbian tlangval hi champion lai a nih bakah tun hnaiah amah el pha an awm meuh loh avangin champion leh tura rinkai ber a ni. Djokovic hian Federer hi vawi 23 hneh tawhin vawi 22 a hneh lo tawh thung.

Djokovic chungchang an zawhna chhangin Federer chuan, "Novak hian tuna a dinhmun hi a phu a, a taimak leh huaisen vang a ni. Hneh theih loh ang maiin a kal tluang a, mahse hneh theih a nih zia ti chiang turin nikum khan vawi thum ka hneh a ni," tiin a khingpui leh elpui chu a huphurh duh bik lo.