Di Maria a dam tawh

Argentina coach Ge-rar-do Martino chuan Thawhṭanni zinga Chile nen Copa America final an khelh turah Angel Di Maria a inlan theih tawh ngei a beisei thu a sawi.

Paris Saint-Germain winger Di Maria hian group stage-ah a malpui a ti na a, a hliam vangin quarterfinal-ah pawh inlan loin semifinal-a United States an hneh ṭum erawh chuan bench-ah ṭhuttir a ni tawh thung.

A player hliam chung-chang sawiin Martino chuan, "Angel hi a taksa hriselna chu a ṭha tawk tawh a, final khelh hmaa inbuatsaihna hun kan neih hi a chhawr ṭangkai thei a nih chuan inkhel bul ṭan tur pawhin a tlak leh tawh maithei," tiin a sawi.

Kum 28-a upa Di Ma-ria hi a vanduai thei hle a, 2014 FIFA World Cup final leh nikum Copa America final te kha hliam vangin a khel thei lo a, kuminah erawh a inlan ve theih tawh ngei beisei a ni.